BOBONARO, 20 agostu 2023 (TATOLI)-Prezidente Repúblika, José Ramos Horta, afirma FALÍNTIL (Forças Armadas de Libertação Nacional de Timor-Leste) sei kontinua horik iha ema hotu nia-fuan durante funu to’o ohin loron.
Xefe Estadu hato’o asuntu ne’e iha ninia deskursu bainhira komemora loron FALÍNTIL ba dala-48 (20 agostu 1975-20 agostu 2023) iha aldeia Odelgomo, suku Ai-Asa, postu administrativu Bobonaro, munisípiu Bobonaro, dominggu ne’e.
Notísia Relevante :Fernanda Lay feto dahuluk pasa revista parada militár iha loron FALINTIL
“FALÍNTIL ne’ebé ohin selebra aniversáriu 48, moris hela iha ema hotu-hotu nia fuan-laran no hodi hanoin antigu kombatente, martir no eroi-asuwa’in sira ne’ebé ami hato’o omenajen,”Horta hateten.
Tuir nia antigu kombatente ho sira-nia família fó liman ba malu hodi hari’i forsa armada (F-FDTL) no ohin ba oin ita hotu tenke fó apoiu másimu liuhosi servisu ba sira-nia saúde no seguransa sosiál ho kualidade ne’ebé modernu tuir sistema integradu inkluzivu.
“Servisu hirak-ne’ebé ami hakarak tan sensível liu hanesan halo par espesiál ba kondisaun militár, konforme isin baruk no neon kole ne’ebé baibain, kona ema militár iha nia vida profisionál,” Prezidente Repúblika ne’e hateten.
Kona-ba sensibilidade, Horta dehan estádu mós haree hodi tau matan ba saúde no servisu sosiál ho tulun hosi médiku no profisionál saúde nian maka ró-ospitál hosi kooperasaun militár Amerikanu (EUA) ka hosi Xina (RPC) ne’ebé sempre mai Timor-Leste hodi fó tratamentu ba militár ho sira-nia família inklui sidadaun baibain iha TL.
“Koperasaun militár ne’ebé ita hakarak ba setór saúde bele buras di’akliu tán liuhosi konstrusaun ba unidade ospitalár ho komponente militár ida,” Horta tenik tan.
Prezidente Repúblika hatutan persiza tau matan nafatin ba situasaun moris Antigu Kombatente ba Libertasaun Nasionál ne’ebé sei integradu iha FALÍNTIL ka sei nafatin iha F-FDTL.
“Esforsu hirak-ne’e hotu metin nafatin, tan la haluha servisu ne’ebé militár sira, feto ka mane, membru FALÍNTIL ka hosi F-FDTL fó aan tomak,” nia hateten.
Nune’e mós Estadu tenke fó valór ba ninia instituisaun rasik atu investe iha ninia dezenvolvimentu no fó biban atu estrutura no membru hotu atu hola parte iha misaun ho responsabilidade, rai-laran ka rai-li’ur, hodi kaer metin dame ka tuir kompromisu internasionál ne’ebé haktuir iha Organizasaun Nasaun Unidas (ONU).
“Tan ne’e, ami laran metin nafatin ho militár sira hotu, feto ka mane, soldadu, sarjentu no ofisiál sira, nu’udar ativu, iha rezerva ka reformadu ona, antigu kombatente ka membru nafatin F-FDTL, ne’ebé ohin selebra loron istóriku ida-ne’e, hodi hanoin importante militár ho ninia família, bainhira atu hari’i no dezenvolve nasaun ho seguransa, nu’udar modernu, sai riku iha dame nia laran,”nia dehan.
Atu dezenvolve nasaun ne’e, Horta hateten presiza nafatin ezemplu di’ak hosi FALÍNTIL sira nia badinas, dixiplina no sakrifísiu, atu bele manán luta ba dezenvolvimentu nasionál, ne’ebé ema hotu- hotu hamutuk kombate kiak iha Timor-Leste.
Notísia Relevante :F-FDTL realiza marcha durante loron-tolu komemora loron FALINTIL ba dala-48
Jornalista: Sergio da Cruz
Editór: Agapito dos Santos
