MALIANA, 25 agostu 2023 (TATOLI)-Komandante Polisía Nasionál Timor-Leste (PNTL) Munisípiu Bobonaro sesante, Superintendente Xefe Antoninho Mauluta, fó hanoin ba membru Polísia sira atu labele enolve-an iha grupu arte-marsíal, bazea ba orden ne’ebé hatún hosi Primeiru Ministru (PM), Kay Rala Xanana Gusmão.
Nia husu membru PNTL Bobonaro atu serbí tuir lei no orden, disiplina liuliu servisu hamutuk ho komunidade hodi garante situasaun seguransa la’o kontroladu iha fatin-fatin.
Nune’e mós apela ba komandante eskuadra no membru efetivu sira hotu atu labele enolve-an iha grupu arte marsiál, tanba Primeiru Ministru, Rala Xanana Gusmão halo ona xamada ba Komandu Jerál atu foti medida rigoroza ba membru sira-ne’ebé la obedese ba lei.
“Ha’u lakohi rona iha Konsellu Superiór, katak imi-nia naran tama lista, tanba dalan úniku iha lista ne’e mak demisaun, ne’e mak hameno hela ba imi, nune’e imi-nia sanan labele tara,” nia hateten iha Maliana, sesta ne’e.
Nia apela asuntu ne’e iha atividade konsellu seguransa munisipál no halo despedida ho autoridade munisípiu Bobonaro, postu no entidade hotu-hotu, molok ba lidera fali komandu munisípiu Baucau.
Nia husu ba komunidade, joven liuliu sira-ne’ebé envolve-aan iha grupu arte-marsiál, atu hametin unidade hodi kontribui ba pás no estabilidade.
Notísia relevante: Mauluta husu parte hotu apoia PNTL asegura materiál eleisaun
“Joven Bobonaro tenke ser kaer metin fiar no unidade ne’ebé harii tiha ona, ita hatene katak hamutuk ita mak na’in foti rai Bobonaro, nu’udar Bobonaro-oan hotu-hotu tenke hakerek naran munisípiu Bobonaro iha fuan, maske hosi organizasaun no grupu ketak-ketak, maibé ita-nia fuan, sentimentu ne’e tenke ser Bobonaro oan, labele hanoin atu estraga, maibé tenke hanoin moos atu hadi’a,” nia apela.
Nia dehan, atu hadi’ak munisípiu Bobonaro la’ós hein de’it ukun-nain sira, maibé tenke hahú hosi baze.
Maske nune’e, Mauluta agradese ba entidade hotu-hotu, liuliu líder arte-marsiál sira iha munisípiu Bobonaro ne’ebé durante ne’e kooopera no kolabora ho autoridade seguransa durante tinan tolu nia laran.
Adjuntu Prezidente Autoridade Munisípiu Bobonaro, João de Fátima do Carmo, agradese no louva Antoninho Mauluta nian, ne’ebé lidera komandu munisípiu Bobonaro.
Nia observa katak komandante Mauluta susesu iha eleisaun prezidensisál no Parlamentár tanba situasaun la’o iha ambiente hakmatek.
Komandante PNTL Munisípiu Bobonaro Foun, Superintedente António María de Sá, orgulu no agradese ba komandu jerál ne’ebé hatún orientasaun hodi lidera Bobonaro.
“Ha’u husu ba ita hotu-hotu atu servisu hamutuk liuliu líder komunitária, komunidade no joven sira, atubele kria establidade nune’e ita lori rai Bobonaro ne’e ba oin, hodi valoriza ita-nia eroi sira-nia sakrifísiu,” nia katak.
Superintendente Antonino Maluta, lidera dahuluk Komandu PNTL Munisípiu Bobonaro iha 20005 durante tinan tolu, ba fali Auleu tinan rua, Covalima tinan lima, Viqueque tinan haat-resin, iha Komando Jerál fulan-neen, kontinua 2021 komanda hikas munísipiu Bobonaro to’o 2023, agora muda fali ba munisípiu Baucau.
Notísia relevante: PNTL halo rotasaun, Komandante PNTL Baucau muda ba Bobonaro
Jornalista: Sérgio da Cruz
Editór: Evaristo Soares Martins
