BOBONARO, 18 abríl 2022 (TATOLI) – Komandante Polísia Nasionál Timor-Leste (PNTL) Munisípiu Bobonaro, Superintendente Antoninho Mauluta, husu ba parte hotu iha munisípiu ne’e atu apoiu membru PNTL sira-ne’ebé destakadu iha sentru votasaun 130 nune’e asegura seguransa iha eleisaun prezidensiál volta daruak ho susesu.
“Ita hotu-hotu tenke serbisu hamutuk tantu PNTL, brigada sira, fiskál, líder polítiku sira-ne’ebé hakarak ba monitoriza iha sentru votasaun karik, tenke apoiu likus ba iha órgaun eleitorál no seguransa nian,” nia apela iha serimónia distribuisaun material eleisaun ne’ebé realiza iha edifísiu STAE munisípiu Bobonaro, segunda ne’e.
Atu asegura festa demokrasia ne’e la’o iha ambiente pás no estabilidade, Superintendente ne’e mós orienta ona memebru kolokadu sira atu presta serbisu iha terrenu tuir ordem komandu nian, hodi mantein no kumpre nafatin regra no hatudu serbisu ho disiplina no profisionál iha terrenu.
“Ha’u husu ba imi hotu, bainhira kuandu ema dehan tuku 06:00 loke ona eleisaun, laiha tán ema ida katak ha’u seidauk hari’is, ha’u seidauk matabisu, tanba ne’e tenke displina oras serbisu no iha tempu servisu labele husik hela fatin,” nia fó hanoin membru polítika destakadu sira.
Nia mós enkoraja brigada no ofisiál supervizaun sira, hahu ohin to’o prosesu eleisaun la’o maka identifika membru PNTL balu abandona sentru votasaun informa kedas ba komandu munisípiu atu nune’e bele xama atensaun ba membru refere.
“Membru sira ita koloka ba ne’e sira-nia família besik laiha, kuandu kalan haree sira ba toba iha família besik, entaun nia ba toba iha uma ketak, ida-ne’e mak hau husu tenke asegura sasán, kaixa ne’e toba iha-ne’e hotu-hotu tenke toba iha-ne’ebá,” nia apela.
Totál membru efetivu ne’ebé kolokadu iha sentru votasaun no estasaun votu sira iha munisípiu Bobonaro hamutuk na’in-144 kompostu hosi membru hosi komandu PNTL munisípiu Bobonaro, Batallaun Orden Públika (BOP), komandu Unidade Patrullamentu Fronteira (UPF) no hetan apoia mós membru sira hosi nasionál.
Notisia relevante: STAE Bobonaro distribui materiál eleisaun ba sentru votasaun 130
Jornalista : Sérgio da Cruz
Editór : Evaristo Soares Martins
