BAUCAU, 22 agostu 2023 (TATOLI) – Komandu Jerál Polísia Nasionál Timor-Leste (PNTL) halo rotasaun ba komandante polísia munisipál sira, nune’e Komandante PNTL Baucau, Superintendente Xefe António de Sá muda ba Bobonaro.
Komandante PNTL Munisípiu Baucau, Superintendente Xefe, António de Sá, esplika, liuhosi formatura ikus transmite ona informasaun hosi komandu nasionál ba membru sira hanesan introduz rezultadu enkontru komandante hotu ba membru sira, liuliu mantein seguransa iha territóriu nasionál no informa mudansa pozisaun nu’udar Komandante PNTL iha Baucau.
“Ha’u sente durante tinan-ida fulan-ualu iha-ne’e entidade hotu kolabora hanesan autoridade munisipál, veteranu no igreja liuliu komponente terrestre F-FDTL kontribui hamutuk hodi utrapasa situsasaun hotu hodi komunidade sira goza sira-nia direitu liberdade,” Superintendente Xefe António de Sá hateten iha Vila Nova, tersa ne’e.
António de Sá hateten, mudansa ne’ebé hala’o bazea ba despaxu hosi Komandu PNTL nasionál hodi deside muda ba munisípiu Bobonaro hodi kontinua misaun iha rai fronteira liuliu garante seguransa ba sidadaun bazea ba misaun PNTL nian.
António de Sá konsidera sai PNTL nu’udar vokasaun nune’e tenke serbí povu ho domin liuliu defende buat-ne’ebé loos no hateten lae ba buat-ne’ebé konsidera sala.
Superintendente Xefe sente kontente durante hala’o kna’ar nu’udar Komandante PNTL Baucau tanba hanesan rai moris fatin durante tinan-ida fulan-ualu.
“Liuhosi dedikasaun ne’ebé fó, maske la barak liu maibé utrapasa situsasaun ho di’ak,” António de Sá akresenta.
Maske mosu perturbasaun hanesan insidente akontese durante mandadu iha Baucau maibé eventu boot tolu hanesan eleisaun prezidensiál, parlamentár no reativa organizasaun arté-marsiál sai sasukat sussesu ba mandatu Superintendente Xefe António de Sá iha Baucau.
António de Sá, argumenta, mudansa ne’ebé iha tuir nesesidade komandu no nu’udar pesoál sempre kumpri orientasaun hosi komandu, liuliu fó seguransa ba sidadaun sira tuir misaun ba iha munisípiu Bobonaro.
Tuir despaxu Komandu PNTL nasionál kargu Komandante PNTL munisípiu Baucau sei lidera hosi atuál komandante PNTL munisípiu Bobonaro, Superintendente Antoninho Mauluta.
Superintendente Xefe António de Sá antes ne’e lidera Komandante PNTL iha munisípiu Covalima durante tinan-tolu, asume mos knaar nu’udar Komandante Unidade Intervensaun Rápida (UIR) tinan-haat,
Alende ne’e, responsável rekursu umanu tinan-ida, tinan-ualu iha Palásiu Prezidensiál, asume mós kargu nu’udar Korpu Seguransa Pesoal (CSI, sigla portugés) no asume mos nu’udar ofisiál internasionál polísia.
Jornalista : Natalino Belo
Editór : Evaristo Soares Martins
