BAUCAU, 26 agostu 2023 (TATOLI)—Governu liuhosi Ministériu Asuntu Kombatente Libertasaun Nasionál (MAKLN) sei konklui halo verifikasaun no validasaun ba dadus veteranu rejistadu 2009 iha tinan ida-ne’e nia rohan.
Notísia Relevente: Veteranu ne’ebé partisipa funu hamutuk 27.629
Sekretáriu Estadu Asuntu Kombatente Libertasaun Nasionál, César dos Santos da Silva, hateten bainhira Prezidente Repúblika, José Ramos Horta, promulga ona proposta orsamentu reaktifikativu mak MAKLN sei hahú loke hikas prosesu verifikasaun no validasaun ba faze daruak iha tinan-ne’e.
“Iha tempu badak MAKLN sei realiza enkontru nivel Ministériu hodi haree prosesu validasaun, tuir mai hodi konklui 25% ne’ebé sei falta hodi holo validasaun,” Sekretáriu Estadu Kombantente Libertasaun Nasionál ne’e hateten iha Uaioli, sábadu ne’e.
Verifikasaun ba dadus veteranu resjistadu 2009 ne’e mós hanesan kompromisu politika IX Governu Konstitusionál ba loron 120, atu kompleita validasaun dadus veteranu hamutuk 93.000 ne’ebé verifika ona dadus 90.000 no restu hela 3.000 mak sei finaliza halo verfikasaun no valida iha iha tinan-ne’e.
Governante ne’e husu autoridade postu too suku atu koopera no fahe informasaun ba komunidade, tanba tuir planu ekipa verifikasaun iha fulan-setembru sei hahú re-verifika tuir postu admistrativu hodi konklui dadus veteranu ne’ebè rejista iha tinan-2009.
Notísia Relevante: Verifikasaun dadus veteranu rejistadu 2009 atinje ona 90%
“Ida-ne’e oportunidade ikus hosi ministériu fó. Bainhira prazu ramata halo reklamasaun, ami sei husu responsabilidade ba autoridade lokál sira,” César da Silva hateten.
Hosi tótal dokumentu nasionál, iha munisípiu Baucau total hamutuk rihun 15.252 ne’ebé kompostu hosu dadus ne’ebé valida ona hamutuk rihun 12.163 (80%) no hela 20% ho totál dokumentu ne’ebé seidauk valida hamutuk 389,000.
Tuiir dadus, munisípiu Baucau iha kada postu admistrativu hanesan postu Baguia hamutuk rihun 1.847 kompostu validasaun 1.275 no falta 562, postu Laga hamutuk rihun 3.745 falta dokumentu 612, postu Quelicai hamutuk 3.233 sei hela dokumentu 837.
Postu Vemase valida ona rihun 1.047 no sei hela 140 hosi tótal 1.187, Venilale tótal rejista rihun 1.216 validan ona 1.910 no seidauk 216 no postu Baucau Vila hamutuk rihun 4.033, valida ona 3.002 no seidauk valida hamutuk 1.031.
Notísia Relevante: Loron 120: CCLN prioriza verifikasaun dadus veteranu rejistadu 2009-fundu kontributivu
Jornalista : Natalino Belo
Editór : Cancio Ximenes
