DILI, 01 setembru 2023 (TATOLI) –Tribunál Judisiál Primeiru Instánsia Díli (TJPID), iha sesta ne’e (01/09) hahú halo julgamentu ba kazu José Bernardo ne’ebé deskonfia tara aan iha sela Komandu Polísia Nasionál Timor-Leste (PNTL)Díli iha setembru tinan kotuk.
Iha julgamentu Tribunál liuhosi Juiz José Maria notifika hodi rona uluk sasin ho insiál GS nu’udar alin hosi matebian José Bernardo.
Tribunál rona uluk sasin ba kazu ne’e, tanba antes ne’e sasin solisita pedidu ida mai iha Tribunál ho razaun sasin atu ba rai-li’ur.
“Tanba ne’e mak Tribunál aseita pedidu sasin nian, ho nune’e liuhosi Juiz José Maria de Araujo notifika sasin sira iha loron lima nian laran para sasin mai hato’o nian depoimentu ba Tribunál relasiona kazu José Bernando nian,” hateten hosi Komunikadu ne’ebé TATOLI asesu ohin.
Nune’e iha tuku 10:00 Tribunál Judisiál Primeira Instánsia Díli liuhosi Juiz Albertina Neves tama ba sala julgamentu hodi prezide Julgamentu ba kazu ne’e.
Enkuantu iha kazu ne’e ema na’in haat mak mak sai arguidu, hosi arguidu sira ne’e mesak autoridade seguransa de’it.
Tuir observasaun jonalista TATOLI iha terrenu julgamentu dahuluk ba kazu ne’e hetan partipasaun hosi familia matebian José Bernardo no nian Defensór Públiku Estaque Guterres inklui parte Organizasaun Justisa Sosiál (JUS) no HAK.
Alende ida ne’e parte arguidu sira hetan akompañamentu hosi nia Advogadu sira inklui hetan solidaridade maluk polísia sira.
Jornalista: Natalino Costa
Editór: Rafael Ximenes de A. Belo
