DILI, 01 setembru 2023 (TATOLI)–Prezidente Repúblika, José Ramos Horta, promulga ona Lei númeru 17/2023, 29 agostu 2023 Orsamentu Retifikativu 2023, ho montante $1.771.867.112.
Xefe Estadu promulga iha loron 29 agostu 2023 no publika ona iha Jornál Repúblika iha loron 01 setembru dadeersan tuku 09:45.
“Mudansa orgánika Governu liuhosi dekretu-lei númeru 46/2023 28 jullu, Orgánika IX Governu Konstitusionál, ezije ajuste iha rúbrika Orsamentu Jerál Estadu (OJE), hanesan objetivu atu otimiza jestaun rekursu públiku,” refere nota ne’ebé Agência Tatoli asesu, sesta ne’e.
Notísia relevante : PN aprova proposta Orsamentu Retifikativu biliaun $1,7 iha finál globál
Atu kontrola konta públika, hamenus despeza iha OJE 2023, hanesan montante transferénsia Fundu Petrolíferu, reflete kompromisu Governu atu garante sustentabilidade finanseira país.
Atu hamenus impaktu hosi inflasaun no aumentu kustu moris sidadaun, halo ona ajustamentu iha taxa impostu seletivu konsumu direitu aduaneiru importasaun aplikável iha tinan 2023, ho hanoin atu populasaun iha kapasidade kompra.
Despeza totál setór públiku administrativu tinan 2023 ho valór konsolidadu $1.771.867.112, administrasaun sentrál ho despeza $1.633.000.000, seguransa sosiál sein fundu rezerva $130.965.306, ne’ebé iha valór totál konsolidadu la kontabiliza montante $75.860.306 hosi seguransa sosiál hosi transferénsia administrasaun sentrál hodi evita kontajen duplikada no Rejiaun Administrativa Espesiál Oé-cusse Ambeno (RAEOA) hetan valór estimadu $83.762.112.
Orsamentu ne’ebé aprovadu kompostu hosi asuntu ekonómiku $439.060.944, abitasaun no infraestrutura koletiva $24.965.254, saúde $94.411.189, edukasaun $136.974.446 no protesaun sosiál $253.389.284.
Ho alterasaun ne’e, autorizasaun tranferénsia hosi Fundu Petrolíferu ne’ebé antes ne’e ho montante $1.346.090.000 sai $1.208.194.889.
Jornalista : Antónia Gusmão
Editora : Julia Chatarina
