DILI, 04 setembru 2023 (TATOLI)– Xefe Estadu-Maior Jenerál FALINTÍL-Forsa Defeza Timor-Leste (F-FDTL), Tenente Jenerál Falur Rate Laek, informa, membru F-FDTL na’in tolu ne’ebé hetan asidente durante ezersísiu predator militár iha Territóriu Norte Darwin Austrália daudaun ne’e, rekoperadu hafoin hetan tratamentu saúde.
“Ita nian na’in tolu mak todan oituan maibé sira rekopera hotu ona, ita tenke simu konsekuénsia tanba treinamentu militár mak nune’e ona,” dehan Falur ba jornalista-sira iha Palásiu Prezidensiál, Bairro-Pite, segunda ne’e.
Notísia Relevante:Membru F-FDTL ne’ebé hetan asidente iha Austrália agora tratamentu hela
Membru F-FDTL na’in tolu ne’ebé maka enfrenta insidente ne’e hanesan Tenente Juvinal Ribeiro, Cabo Agostinha dos Santos, no Soldado Bartolameu de Souza Nunes.
Membru na’in tolu ne’e, desloka bá Austrália hamutuk ho na’in 27 seluk iha semana kotuk kompostu hosi Komponente Terrestre (CT) no Unidade Apoio Servisu (UAS) hodi bá partisipa misaun Forsa Armada kona-ba ezersísiu kombinadu ida ho naran “Exercicies Predators” iha Darwin Austrália ne’ebé inísia hosi Forsa Defeza Austrália iha tinan barak nia laran ona, no nasaun barak hosi rejiaun pasífiku mós partisipa iha treinamentu militár ne’e.
Sira na’in tolu hetan asidente iha loron 30 fulan-agostu 2023 bainhira hala’o hela prátika ezersísiu kona-ba tátika viatura, no iha tempu ne’ebá médiku Forsa Austrália nian evakua kedan bá ospitál hodi halo tratamentu saúde no dadaun ne’e kondisaun saúde di’ak ona maibé sei nafatin halo tratamentu.
Ezersísiu kombinadu ne’e dezeña hosi nasaun viziñu Austrália, hodi konvida militár hosi F-FDTL mós bá partisipa, tanba ne’e, hosi Timor-Leste haruka membru F-FDTL hamutuk ema na’in 30 hodi partisipa treinamentu to’o remata baseia ba oráriu ne’ebé maka iha dala ruma semana ida to’o fulan ida.
Jornalista: Hortencio Sanchez
Editór :Agapito dos Santos
