DILI, 05 setembru 2023 (TATOLI)—Deputadu bankada CNRT no FRETILIN iha Parlamentu Nasionál (PN), preokupa ho folin foos kontinua sa’e iha merkadu.
Deputadu bankada CNRT, Patrocínio Fernandes, preokupa no husu IX Governu Konstitusionál liuhosi Sentru Lojístika Nasionál (SLN) atu halo intervensaun ho lalais tanba folin foos iha munisípiu kontinua sa’e ba beibeik.
Notísia Relevante: Membru PN preokupa ho folin foos sa’e iha merkadu
“Informasaun sira tama mezmu ita hanoin Orsamentu Retifikativu ita konsege introdús artigu sira hatun taxa, maibé folin foos kontinua sa’e. Aat liután sa’e makaas liu iha iha munisípiu no iha área rurál, tanba iha fatin balun folin foos sa’e to’o $20, ida-ne’e susar tebe-tebes ba ita-nia populasaun sira-nia kapasidade kompra. Ita kompreende talves tanba impaktu hosi taxa ne’ebé sa’e-ne’e iha tempu ne’eba, ita seidauk sente tanba loza sira nafatin sei iha estoke tuan. Agora, ita foin sente tanba estoke foun, entaun foos no sasán nesesidade bázika sira-nia folin sa’e, tanba ita nia emprezáriu sira seidauk bele hatama sasán bazea ba mudansa ne’ebé halo iha Orsamentu Retifikativu 2023,” nia hateten liuhosi reuniaun plenária PN, tersa ne’e
Situasaun ne’e iha orsamentu dotasaun todo Governu, parte Governu lihosi Sentru Lojístika Nasionál (SLN) haree alternativu intervensaun lalais merkadu liuliu folin foos ne’ebé sa’e nafatin ne’e.
Deputada Fretilin, Helena Martins, preokupa mó ba nesesidade povu nian liuliu folin foos ne’ebé kontinua sae iha merkadu.
“Masin-midar nia folin tun fali ona. Folin foos sa’e tiha ona liuliu faan iha postu administrative neé ninia folin to’o $22, ne’e kestionável. Tanba ne’e, labele dehan hatun ona taxa atu tun, agora mak ita sente saida, afinál taxa ne’e tun ba de’it masin-midar no povu hateten masin-midar ne’e povu hateten halo kafe dala ida ka rua de’it. Maibé, ba folin foos mak importante liu nesesidade bázika iha família ida,” nia dehan.
Notísia Relevante: PN aprova hatun taxa importasaun hosi 5% ba 2,5%
Jornalista : Nelson de Sousa
Editór : Cancio Ximenes
