VIQUEQUE, 09 setembru 2023 (TATOLI)–Veteranu munisípiu Viqueque sente triste lakon saudozu Evaristo Amaral hosi suku Luca, postu administrativu Viqueque, munisípiu Viqueque.
“Ami sente lakon ami-nia maluk di’ak ida hanesan saudozu Evaristo Amaral, ne’ebé durante tempu invasaun Indonézia, saudozu hanesan forsa armada kontra militár okupante sira, maibé agora ninia pregrinasaun iha mundu ramata ona. Ami sente lakon ami-nia ema ne’ebé dedika-an ba luta libertasaun independénsia Timor-Leste. Moris iha munda ne’e tempu ida sei fila bá mundu seluk, tanba ne’e nu’udar planu Maromak nian, maibé ami sempre orienta ba maluk sira bainhira moras tenke bá ospitál hodi pesoál saúde sira bele kontrola no labele mate iha uma maibé mate iha ospitál atu ita bele hatene moras loloos,” Sekretáriu Ezekutivu Konsellu Veteranu munisípiu Viqueque, Daniel Sarmento Soares ‘Fogeti’, hateten hafoin partisipa serimónia fúnebre saudozu Evaristo Amaral, iha semitériu Sukar Midar, suku Luca, sábadu ne’e.
Estadu rekoñese ona saudozu Evaristo Amaral ho 4 A7 no hetan subsídiu, maibé saudozu deskorda ho rekoñesimentu, nune’e nia halo ona karta reklamasaun, ne’ebé daudaun ne’e iha hela Ministériu Asuntu Kombatente Libertasaun Nasionál.
“Maibé daudaun saudozu fila ona ba mundu seluk, ne’ebé ami husu ba família sira bainhira halo verifikasaun tenke bá aprezenta saudozu nian hodi hetan direitu,” nia akresenta.
Notísia relevante : Veteranu Viqueque prefere Governu tau prioridade ba dezenvolvimentu
Saudozu Evaristo Amaral hahú moras iha tinan 2017, nune’e família sira lori ba ospitál Viqueque, hafoin hetan hetan tratamentu di’ak filafali, maibé iha loron 05 setembru 2023 saudozu hetan atake tanba moras stroke iha ninia rezidénsia iha suku Luca, nune’e família sira liga ambulánsia hodi lori ba internamnetu Viqueque maibé seidauk to’o iha fatin, to’o iha área Sukaer Oan suku Uma-ki’ik lorokraik maizumenus tuku 17:00 lorokraik saudozu hakotu iis. Hafoin ida-ne’e, família sira lori fila saudozu bá ninia rezidénzia hodi halo prosesu fúnebre iha suku Luca.
Iha fatin hanesan, oan daruak hosi saudozu, António Amaral, sente triste tanba lakon aman ne’ebé durante ne’e haree oan sira.
“Foin lalais moras filafali ami lori halai ba ospitál maibé to’o de’it iha dalan klaran iis kotu. Nune’e ami oan kiak no faluk hakarak husu Governu hodi tau matan ba saudozu nia surat reklamasaun hodi konsidera nia kontribuisaun ba nasaun,” nia tenik.
Saudozu Evaristo Amaral moris iha aldeia Uma-Lor, suku Luca, postu administrativu Viqueque Vila, munisípiu Viqueque, iha loron 01 janeiru 1950.
Saudozu hosi uma lisan Wequilan, oan hosi Mariano Amaral no inan Rosa Amaral, ho maun alin hamutuk na’in-neen, kompostu hosi mane haat no feto rua, hanesan Pedro Amaral (falesidu), Evaristo Amaral (saudozu), Ana Evaristo Amaral (falesida), Gonjalos Amaral (falesidu), Eduardo Marques no Anita Marques Durante.
Iha tempu okupasaun Indonézia, saudozu Evaristo Amaral oferese nia an tomak hodi defende nia rai hodi hetan independénsia. Saudozu ninia partisipasaun iha luta libertasaun nasionál, hahú kaer arma iha loron 20 agostu 1975 iha Uetodu. Hafoin, iha loron 19 dezembru 1975 arranka bá Aileu hamutuk ho Adjuntu kódigu Manukei (Oscar), bainhira saudozu fila hosi Aileu hamutuk ho Ministru Mau Kruma, ho elementu sira hosi Komité Sentrál Fretilin, Solan Inaçio Fonseca no Chai Fernando Teles iha loron 23 dezembru 1975.
Hafoin, hosi reuniaun iha Soibada, saudozu hanesan forsa setór, iha jullu 1976-1977. Saudozu kontinua partisipa direita iha reuniaun Laline iha fulan-jullu ba Brigada Choque.
Nune’e, iha tinan 1977 to’o 1979 saudozu nafatin iha Brigada Choque to’o inimigu militár Indonézia kaptura saudozu iha área Uaimori hodi lori saudozu bá Venilale iha fulan-abríl. Forsa setór iha liña 314.
Saudosu Evaristo Amaral hanesan kaben-na’in, forma família ho fen dahuluk Leonia Amaral iha tinan 1980 hetan oan hamutuk na’in-ualu, Rosa Amaral, Judit Amaral (falesidu), Mariano Amaral (falesidou), Teresina Amaral, Anateresa Amaral, Rosalia Amaral, Antonio Amaral no Sebastido Amaral (falesidu).
Saudozu Evaristo Amaral nia oan mate durante okupasaun Indonézia iha tinan 1991 no fen kaben dahuluk hakotu iis. Iha tinan 1995 Saudosu Evaristo Amaral hahú forma família ho Modestina Amaral, ho grasa ne’ebé Nai Maromak haraik ba sira na’in-rua hodi hetan oan hamutuk neen hanesan, Abili Felis Amaral, Elizia Amaral, Pedro Amaral, Maria Ludres Amaral, Alexandre Amaral no Gelensia Amaral.
Saudozu Evaristo Amaral hetan moras stroke hahú hosi outubru 2017, ho família nia esforsu tomak lori saudozu ba ospitál maibé la konsege kura.
Saudozu moras durante tinan hitu nia laran, ne’ebé iha loron 05 setembru saudozu hakotu iis, husik hela oan, bei oan no na’in oan hamutuk na’in-40.
Jornalista : Vitorino Lopes da Costa
Editora : Julia Chatarina
