iklan

NASIONÁL, POLÍTIKA

SEI realiza diskusaun panel reformasaun traballadór doméstiku iha TL

SEI realiza diskusaun panel reformasaun traballadór doméstiku iha TL

Sekertaria Estadu Igualidade, Elvina de Sousa Carvalho. Imajen Tatoli/Francisco Sony.

DILI, 12 setembru 2023 (TATOLI)—Sekretáriu Estadu Igualdade (SEI) no Embaixadora Austrália ba Igualdade Jéneru, segunda (11/09) ne’e, realiza diskusaun panel kona-ba reformasaun traballadór doméstiku iha Timor-Leste.

Notísia Relevante: SEI prioriza haree rejime jurídiku traballu doméstiku iha loron 120

Diskusaun ida-ne’e foka ba xave dezafiu sira-ne’ebé mak traballadór doméstiku sira hasoru iha nasaun no rejiaun ne’e nia laran, no sei fornese proposta reformasaun lejislativu ne’ebé mak daudaun ne’e lidera hosi Sekretária Estadu Formasaun Profisionál no Empregu (SEFOPE).

Sekretáriu Estadu Igualdade (SEI), Elvina Sousa Carvalho, hateten atu hatán ba menus iha protesaun ba traballadór doméstiku sira, SEI servisu hamutuk ho SEFOPE hodi fó advokasia no kooperasaun atu kria regulasaun favorável sira-ne’ebé mak sei proteje traballadór doméstiku sira-ne’ebé mak maiória feto de’it.

“Hadi’ak lejislasaun traballadór ba feto sira hanesan prioridade hosi programa IX Governu nian ne’ebé atribui ba SEI atu koordena no kolabora ho instituisaun relevante sira atu aprova lei ne’ebé sei garante kondisaun servisu ba traballadór sira ho di’ak liután, iha tinan lima tuir mai ne’e,” Elvina Sousa Carvalho hateten liuhosi nota ne’ebé Agência Tatoli asesu, tersa ne’e.

Nia hatutan, proposta-lei ba traballadór doméstika sira hatama ona hosi Governu anteriór ba iha Parlamentu Nasionál maibé tanba agora iha lejislatura foun, entaun ida-ne’e presiza evaluasaun no aprezentasaun ba Governu fila-fali atu hetan aprovasaun.

“Traballadór doméstiku sira daudaun ne’e la proteje ho Lei Kódigu Traballadór Timor-Leste nian, ne’ebé determina kriasaun ba regulasaun espesiál ba traballadór doméstiku sira. To’o agora, sira seidauk iha direitu ba saláriu minimu, oras servisu ne’ebé mak regulár no direitu sira seluk hanesan atu foti loron feriadu anuál no lisensa médiku,” nia dehan.

Iha parte pozitivu, merkadu servisu ba traballadór doméstiku ida sai hanesan dalan ida atu permite feto profisionál sira atu tama fali servisu hafoin partus, traballu doméstiku sei permite feto traballadór doméstiku no profisionál sira-nia partisipasaun atu fila-fali ba iha forsa traballu formál nian.

Traballadór doméstiku reprezenta 2,3% hosi empregu globalmente (ema ida (1) hosi kada traballadór na’in-25), tanba iha Azia Pasifiku mak empregadór boot-liu iha traballadór doméstiku rejiaun ida-ne’e hanesan fatin ba traballadór millaun 38, metade hosi traballadór doméstiku mundu tomak.

Importante liu, traballadór feto hamutuk 80.5% iha setór ne’e, besik 62% mak eskluidu hosi lei traballadór nian no 94 % laiha limitasaun legál ba oras no loron servisu nian.

Notísia Relevante: Komisaun D suspende diskusaun projetu-lei traballu doméstiku

Embaixadora Austrália ba Igualdade Jéneru hanesan defensora prinsipál Austrália nian ba igualdade jéneru no direitu ba feto no labarik-feto sira-nian internasionalmente, Stephanie Copus Campbell, sente orgullu realiza diskusaun ida-ne’e.

“Embaixada Austrália iha Timor-Leste orgullu atu realiza hamutuk eventu ida-ne’e ho Sekretária Estadu ba Igualdade hanesan reflesaun ida ba ami-nia komitmentu atu fasilita diálogu kona-ba politika igualdade jéneru ho Governu no parseiru sosiedade sivil sira,” nia hateten.

Vise Prezidente Konsellu Nasionál Traballu, Angelo Santos Veloso, hateten iha inisisu 2016, liuhosi tripartida reprezentante hosi Governu, KSTL rasik no hosi sosiedade sivil hahú ona esbozu lejislasaun ba traballadór doméstika nian depois prosesu iha konsultasaun no ramata tanba prosesu tenke submete iha Konsellu Ministru (KM).

“Maibé, ikus mai la realiza no aprova, depois lei ne’e rasik haruka fali mai no iha VII Governu ami subemete fila-fali, Komu VII Governu nia governasaun fulan sia de’it, ita labele halo buat ida, lei ne’e rasik haruka fali mai. Depois iha VIII Governu lejislasaun ba traballadór doméstiku ne’e submete fila-fali. Ami espera katak atu aprova maibé realidade mandatu ramata, la aprova. Ha’u fiar katak IX Governu ida-ne’e hamutuk ho SEFOPE no parseiru sira inklui SEI hodi esforsu, nune’e bele hetan aprovasaun iha IX Governu nia mandatu ida-ne’e,” nia dehan.

Tanba ida-ne’e, nia hateten, SEI no parseiru sira ko’alia kona-ba traballadór doméstika nian, servisu trabaladór nian ne’e sensitivu la halimar, ita leno ba ita-nia konstituisaun esplika klaru iha ne’ebá. Lei traballu númeru 4/2012, iha artigu 2, iha alinea “g” hateten katak sei kria lejislasaun espesifiku ba traballadór doméstika ne’e. Tanba ne’e, iha VII Governu hahú kedas maibé la hetan aprovasaun,” nia dehan.

Prezidente Konfederasaun Sindikatu Timor-Leste (KSTL), Almerio Vila Nova, hateten Governu tenke tau prioridade ba lei traballu doméstiku.

“Primeiru, atu haree kompromisu Governu nian atu aselera esbozu lei trabaladór doméstika, tanba prosesu kle’ur demais ona. Ita presiza proteje ita-nia maluk trabaladór doméstiku sira liuliu feto, nune’e presiza aprova lei espesifiku ba traballu doméstiku. Ida-ne’e hanesan dalan di’ak atu alkansa traballu inosente ba traballadór doméstiku. Entaun, ami hein katak programa Governu ba loron 120 ne’e, SEI ho SEFOPE tenke tau prioridade ba lei traballu doméstiku ne’e,” nia hateten.

Traballadór doméstiku sira daudaun ne’e la proteje ho Lei Kódigu Traballadór Timor Leste nian, ne’ebé determina kriasaun ba regulasaun espesiál ba traballadór doméstiku sira.

To’o agora, sira seidauk iha direitu ba saláriu minimu, oras servisu ne’ebé mak regulár no direitu sira seluk hanesan atu foti loron feriadu anuál no lisensa médiku.

Membru panel sira-ne’ebé halo diskusaun panel kona-ba reformasaun traballadór doméstika iha Timor-Leste ne’e mak Embaixadora Australiana ba Igualdade Jéneru, Sephanie Copus Campbell, Sekretária Estadu Igualdade (SEI) Elvina Sousa Carvalho, Vise Prezidente Konsellu Nasionál Traballu Angelo Santos Veloso, Diretór Working Women’s Centre Timo -Leste Ricar Pascoela, Prezidente Konfederasaun Sindikatu Timor-Leste (KSTL) Almerio Vilanova no Reprezentativu Organizasaun Traballadór Internasionál nian Rita Fernandes.

Notísia Relevante: INSS apresia PN ba inisiativa kria lei kona-ba traballu doméstiku

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!