DILI, 29 setembru 2022 (TATOLI)—Prezidente Institutu Nasionál Seguransa Sosiál (INSS), Longuinhos Armando Leite, fó apresiasaun ba Parlamentu Nasionál (PN) kona-ba inisiativa atu kria projetu-lei traballu doméstiku ba membru Komisaun D ne’ebé trata asuntu ekonómiku no dezenvolvimentu.
Notísia Relevante: Komisaun D no entidade relevante hahú diskute projetu-lei Traballu Doméstiku
“INSS konsidera katak inisiativa deputadu sira-nian iha kriasaun lei traballu doméstika importante tebes ba ita-nia populasaun. Ita presiza garante direitu ita-nia servisu doméstiku iha país,” Longuinhos Armando Leite hateten ba Agência Tatoli, iha servisu fatin Caicoli, Dili, kinta ne’e.
Governante ne’e mós subliña katak bainhira ema balun ba servisu ba ema seluk, funsionáriu sira tenke rejista INSS atu garante futuru traballador sira-nian.
“Imi tenke rejistu iha INSS atu hetan destinu ba traballadór sira,” nia dehan.
Nia hatutan, INSS nu’udar instituisaun téknika, prontu atu implementa kriasaun lei.
“Nu’udar servisu-na’in, sira sente kontente tebes kuandu ami-nia deputadu sira foti inisiativa atu kria lei kona-ba serbisu doméstiku,” nia dehan.
Prezidente Komisaun D, ne’ebé trata asuntu ekonómiku no dezenvolvimentu hamutuk ho entidade relevante sira, hahú ona halo audiénsia públika hodi diskute no rona proposta lei 43/V (4a) kona-ba rejime jurídiku ba servisu doméstiku.
“Objetivu hosi kriasaun lei ne’e atu garante futuru empregadór sira-nian, objetivu seluk mak atu regulariza traballadór doméstiku sira,” nia dehan.
Vise-Prezidente Komisaun D konvida tiha ona Sekretáriu Estadu Formasaun Profisionál no Empregu (SEFOPE), Uniaun Komérsiu Timor-Leste (KSTL).
Jornalista : Osória Marques
Editór : Cancio Ximenes
