iklan

NASIONÁL

PM Xanana orienta ministériu tolu no SNI prepara planu asaun anuál 2024

PM Xanana orienta ministériu tolu no SNI prepara planu asaun anuál 2024

Primeiru-Ministru, Kay Rala Xanana Gusmão, konvoka enkontru ho ministériu no instituisaun tutela, iha salaun Prezidénsia Konsellu Ministru, Palásiu Governu, sesta (15/09/2023). Imajen Tatoli/Francisco Sony

DILI, 15 setembru 2023 (TATOLI)-Primeiru-Ministru (PM), Kay Rala Xanana Gusmão, konvoka enkontru no orienta ministru tolu inklui Servisu Nasionál Intelijénsia (SNI) prepara planu asaun anuál tinan 2024.

Ministru tolu kompostu hosi Ministru Defeza Donaciano do Rosário Gomes, Ministru Interiór Francisco da Costa Guterres, Ministériu Justisa, lideradu Amândio Deságua Benevides, no Diretór SNI, Longuinhos Monteiro, inklui akompaña mós hosi Ministru Prezidénsia Konsellu Ministru, Agio Pereira.

“Ministériu no instituisaun Estadu ne’ebé tutela diretamente iha Primeiru-Ministru, tanba ne’e mak ami reuniaun ho Primeiru-Ministru hodi ko’alia kona-ba planu asaun anuál no orsamentu tinan 2024 nian kada ministériu hirak ne’e hodi bele asegura kontinuasaun serbisu sira hodi serbí povu no nasaun,” Ministru Interiór, Francisco da Costa Guterres, relata hafoin ramata reuniaun, iha Palásiu Governu, sesta ne’e.

Notísia relevante : MAE-administradór munisípiu sira hahú diskute Planu Asaun Anuál 2024

Nia dehan, ho ida-ne’e entidade hirak ne’e haree no prepara ona planu prioridade sira ne’ebé sei implementa iha tinan 2024, ne’ebé sei haree iha área infraestrutura, ekipamentu, no kapasitasaun rekursu umanu, inklui reforsa pesoál ne’ebé tuir planu Governu sei halo rekrutamentu ba membru Polísia Nasionál Timor-Leste (PNTL) iha tinan oin.

Ministériu Interiór iha planu prioridade iha tinan 2024 atu halo reestruturasaun ministériu bazeia ba Lei Orgánika foun.

“Tanba ami hasoru diresaun jerál ida hodi rezolve problema iha ministériu nian, tanba ne’e ami sei foku ba edukasaun sívika ho intensaun mentaliza joven hodi kria pás no estabilidade iha rai-laran,” nia akresenta.

Aleinde ne’e, sei reoganiza Polísia, ezemplu ida maka hakbiit kapasidade investigasaun kriminál, mellora kapasidade investigasaun no eleva estatutu hodi fó forsa ba sira hodi hala’o serbisu di’ak liután.

MI komprometidu mós hadi’a kondisaun Servisu Migrasaun no Unidade Patrullamentu Fronteira hodi halo kontrolu iha fronteira.

“Primeiru-Ministru husu ami atu prepara planu di’ak no haree uluk ida ne’ebé prioridade no importante liu,” nia tenik.

Jornalista     : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!