DILI, 31 agostu 2023 (TATOLI)—Ministériu Administrasaun Estatál (MAE) hamutuk ho Administradór munisípiu sira hodi hahú diskute Planu Asaun Anuál ba tinan 2024 iha salaun Delta Nova, Dili.
“Ohin ami ho administrasaun sira iha ne’e hodi ko’alia kona-ba Planu Asaun Anuál tinan 2024 nian, tanba ita iha ona kalendáriu hosi Ministériu Finansa katak atu submete Planu Estratéjiku Nasionál ho Planu Asaun Anuál 2024. Entaun, iha ne’e ministériu sira-ne’ebé fó ona nia servisu ba munisípiu kuaze 10 resin iha ne’ebá. Nune’e, ohin, ami mai prepara Planu Asaun Anuál 2024 munisípiu nian ho Orsamentu Jerál Estadu 2024,” Tomás Cabral hateten ba jornalista sira iha salaun Delta Nova, kinta ne’e.
Tanba, nia hatutan, iha munisípiu dekretu-lei tolu (3) fó kompeténsia ba administrasaun munisipál ba orsamentu rasik maibé barak liu ne’e sira halo iha bens servisu.
“Ita hatene katak foin daudaun inundasaun boot iha 2021, no iha fulan-jullu 2023 mós mosu inundasaun. Ida-ne’e administrasaun mak halo levantamentu ba infraestrutura bázika ba 2024 no halo mós levantamentu fundu infraestrutura depois haruka ba Obra Públika. Tanba sira mak hela besik liu komunidade, nune’e hahú ohin kestaun tékniku no prosedimentu atu prienxe planu Asaun Anuál no Orsamentu 2024. No, aban ita kontinua aprezentasaun matéria munisípiu nian,” governante ne’e hateten.
Membru Governu ne’e hatutan, aministradór munisípiu mak besik liu povu no sira hatene liu kona-ba infraestrutura bázika sira.
“Ita seidauk hatene orsamentu hira mak tau iha tinan 2024 nian, tanba ita foin mak diskute orsamentu. Ita-nia povu sira hela iha aldeia no suku sira, entaun orsamentu ne’e sei fó prioridade liu ba infraestrutura bázika sira iha munisípiu,” nia hateten.
Entaun, ida-ne’e Komité Revizaun Orsamentu mak sei koloka envelope fiskál ba munisípiu sira, maibé importante mak tenke iha Planu Asaun Anuál, nune’e bele prodús Orsamentu Jerál Estadu ne’e.
Jornalista : Osória Marques
Editór : Cancio Ximenes
