VIQUEQUE, 22 setembru 2023 (TATOLI)—Komisaun Nasionál Eleisaun (CNE, sigla portugés), sesta ne’e, realiza edukasaun sívika iha postu administrativu Ossu, munisípiu Viqueque.
Administradór postu Ossu, Sebastião Pereira Pires, konsidera atividade ne’e importante tebes ba abitante sira hodi bele kompreende eleisaun suku ne’ebé sei realiza iha loron 28 outubru 2023.
“Ha’u hanoin edukasaun sívika ne’e importante ba ita hotu hanesan eleitór iha postu ne’e hodi bele prepara-an ba prosesu eleisaun suku ne’ebé sei realiza iha fulan-oin. Tanba ne’e, ha’u husu ba abitante sira tenke partisipa iha sosializasaun hodi ezerse diretu votu iha eleisaun suku no hili líder suku no aldeia ne’ebé sei sai aman ida hodi mobiliza abitante sira,” Administradór hateten iha ámbitu abertura edukasaun sívika, iha salaun Radiquiu, postu Ossu, sesta ne’e.
Eleisaun suku hili xefe suku no xefe aldeia ne’ebé sei realiza tuir mai sei jere hosi suku rasik nune’e bele besik liu ba abitante sira hodi rona preokupasaun atu define programa prioridade ba dezenvolvimentu.
“Ita tenke define elementu ida ne’ebé sai importante hodi halo dezenvolvimentu. Ho ida-ne’e abitante sira presiza rona sosializasaun kona-ba eleisaun suku,” nia akresenta.
Notísia relevante : CNE fó edukasaun sívika ba eleitór-sira iha Viqueque
Nia relata, postu Ossu rejista eleitór hamutuk na’in-14.000 mak partisipa iha eleisaun prezidensiál no parlamentár, maibé eleitór 8.000 mak vota, nune’e partisipasaun mínimu. Postu Ossu kompostu hosi suku 10 no aldeia 59.
“Entaun ba eleisaun suku, ha’u husu ba xefe suku no xefe aldeia sira iha postu Ossu atu organiza eleitór sira partisipa no fihir didi’ak kandidatu sira hodi sai autór ba dezenvolvimentu,” nia fó hanoin.
Nune’e mós, Ofisiál CNE destakadu munisípiu Viqueque, Olávio da Costa Monteiro, agradese ba eleitór iha postu Ossu ne’ebé partisipa ona iha edukasaun sívika hodi prepara ba eleisaun suku.
“Ha’u husu ba partisipante sira atu hatutan informasaun ba eleitór sira seluk ne’ebé la partisipa iha edukasaun sívika ida-ne’e,” nia akresenta.
Atividade ne’e partisipa hosi ema na’in-120 resin, kompostu hosi entidade sira hanesan atuál xefe suku no xefe aldeia sira, delegadu, estudante sira hosi Ensinu Báziku Santa Teresinha Minu de Jesus inklui entidade relevante hosi suku Builale, Liaruka, Ossu de Cima, Loihunu.
Jornalista : Vitorino Lopes da Costa
Editora : Julia Chatarina
