Horta regresa, semana oin kontinua viajen ba Dubai
DILI, 26 setembru 2023 (TATOLI) – Prezidente Repúblika José Ramos-Horta, ohin, fila mai Timor-Leste hafoin partisipa iha Asembleia Jerál Organizasaun Nasaun Unida (ONU) hodi diskute kona-ba asuntu mundiál nian maibé semana oin sei viajen fali ba Dubai hodi partisipa reuniaun sobre dezenvolvimentu no investimentu.
Horta to’o Timor-Leste ho aviaun Aero Dili iha Aeroportu Internasionál Prezidente Nicolau Lobato maizmenus tuku 13:57 otl.
“Semana ida ha’u iha Nova Iorke hodi partisipa iha Asembleia Jerál ONU nian no atividade lubuk ida ne’ebé ha’u partisipa hodi ko’alia kona-ba asuntu mundiál no Timor-Leste nian no semana oin ha’u sei viajen ba fali Dubai”, Horta dehan ba jornalista sira iha sala VIP, Aeroportu.
“Ha’u hela iha ne’e loron lima tan de’it sei fila fali ba Dubai hodi partisipa iha reuniaun ida kona-ba dezenvolvimentu, investimentu, Primeiru-Ministru sei labele ba tanba okupadu ho servisu rai laran, entaun ha’u mak tenke ba partisipa”, nia afirma.
Nia adianta, hafoin partisipa reuniaun iha Dubai, Xefe Estadu sei semo fali ba Saudi Arabe hodi partisipa simeira Azian nian hamutuk ho nasaun Gulf Cooperation Council (GCC).
“Simeira GCC ne’e foin primeira-vez, lider Timor-Leste nian, ha’u husu ba Primeiru-Ministru atu ba maibé nia nafatin okupadu entaun ha’u mak tenke ba, hodi ko’alia asuntu balun iha ne’ebá”, nia hakotu.
Notísia relevante : Xefe Estadu relata demokrasia TL iha ONU
Xefe Estadu levanta kestaun krize hamlaha iha Nova Iorke
Xefe Estadu partisipa simeira AOSIS iha Nova Iorke
Jornalista: Hortencio Sanche
Editór : Zezito Silva
