VIQUEQUE, 27 setembru 2023 (TATOLI)—Sekretáriu Estadu Peska, Domingos da Conceição dos Santos, hateten, daudaun ne’e ekipa prepera hela hodi distribui bero fiberglass ba peskadór sira.
“Ami sei distribui bero ba ita-nia peskadór sira iha tempu badak nia-laran tanba Governu prepara ona bero hamutuk unidade 41 inklui mákina ba parte Kosta Súl inklui iha munisípiu Viqueque hodi uza ba peska,” Sekretáriu Estadu informa ba Agência Tatoli, iha edifísiu Servisu Ministériu Agrikultura no Peska (SMAP) Viqueque, Beloi, kuarta ne’e.
Governante ne’e dehan, distribuisaun bero ne’e bazeia ba pedidu hosi grupu peskadór, nune’e ekipa responsável halo ona verifikasaun no hein de’it halo distribuisaun ba munisípiu sira hanesan Covalima, Bobonaro, Ainaro no Viqueque.
“Munisípiu haat ne’e balun sei hetan 10 no balun sei hetan sia, depende hosi pedidu ne’ebé grupu sira hato’o ba ami,” nia akresenta.
Notísia relevante : Governu entrega béro fiberglass ho nia-mákina tasi ba grupu peskadór sanulu
Distribuisaun kompostu hosi bero, mákina no materiál sira seluk.
“Ha’u sei koordena ho ministru maka foin distribui. Distribuisaun bero sei realiza iha tinan ida-ne’e. Bainhira distribui hotu ba grupu sira, ekipa sei akompaña, nune’e entidade hirak ne’ebé tenta fa’an sei halo investigasaun,” governante ne’e tenik.
Tuir dadus hosi SMAP Viqueque, bero ne’ebé daudaun iha grupu peskadór sira hamutuk 210, uzadu hamutuk 37 no la utiliza hamutuk 173.
Enkuantu, grupu peskadór ne’ebé rejista SMAP Viqueque purvolta 12 ne’ebé moris ho vida peska.
Jornalista : Vitorino Lopes da Costa
Editora : Julia Chatarina
