OÉ-CUSSE, 27 setembru 2023 (TATOLI) – Diresaun Rejionál Infraestrutura liuhosi Departementu Servisu Água Saneamentu (SAS), Rejiaun Administrativa Espesiál Oé-Cusse Ambeno (RAEOA), aloka millaun $1-resin hosi Orsamentu Jerál Estadu (OJE) 2023 nian hodi halo instalaun kontinuasaun sistema perfurasaun bee-moos ba komunidade sira iha fatin lima kabe ba sub-rejiaun Oésilo Pante Makasar no sub-rejiaun Nítibe.
Notísia relevante: Arsenio Bano: “Ha’u-nia prioridade hakarak rezolve problema bee-moos iha Oé-Cusse”
Xefe Departamentu SAS Oé-Cusse, Zulmira da Silva, informa, orsamentu millaun $1-resin ne’e, aloka ba iha projetu kontinuasaun iha sub-rejiaun sira. No projetu kontinuasaun sira ne’e sei hala’o iha perfurasasaun bee-moos iha fatin lima, ne’ebé instala ona 2022.
“Projetu lima ne’e, hanesan projetu kontinuasaun sistema perfurasaun Aen-Mat, atu kontinua sistema ne’e liga ba Aos-Ero, suku Lifau, no projetu kontinuasaun sistema perfurasaun iha Noa-Ana, hodi kontinua instala ba iha aldeia Mahata, suku Lela-Ufe,” Zulmira da Silva ba Agência Tatoli iha Oé-Cusse, kuarta ne’e.
Nune’e mós, projetu kontinuasaun sistema perfurasaun ida iha Noél-Ekat, ida-ne’e sei instala liña distribuisaun ba iha Oésilo sentru, no mós instala ba aldeia Tumin.
“Ida-ne’e ita sei halo koneksaun mós hosi sistema tuan, nune’e bele ba to’o aldeia Nonquikan, pertense suku Bobometo, ida seluk, kontinua halo instalasaun ba sistema bee-moos iha Oénunu, suku Suni-Ufe ba komunidade sira,” nia informa.
Ikusliu maka sistema perfurasaun sei kontinua tán iha suku Taiboko, hosi sitema bomba Liplao nian, persiza kontinua tanba iha antes ne’e, instala de’it torneira públiku unidade lima de’it.
“Maibé ita sei aumenta tán, tanba iha fatin ne’e komunidade barak entaun SAS sei instala tán torneira balu nune’e komunidade sira bele asesu ho distánsia besik,” nia afirma.
Notísia relevante: PA RAEOA inaugura perfurasaun sistema bee-moos iha Cunha
Entretantu, konstrusaun sistema rede distribuisaun iha fatin lima ne’e maka hanesan, kontinua halo instalasaun bee-moos sistema perfurasaun Noél-Ekat iha suku Bobometo, sub-rejiaun Oésilo sei ezekuta hosi kompañia Fraternity Unipesoál Lda ho kustu $734,741.02.
Kontinua halo instalasaun bee-moos sistema perfurasaun Aen-Mat iha suku Lalisuk, sub-rejiaun Pante Makasar, ezekuta hosi kompañia Uma Oli Unipesoál Lda ho kustu $233,062.76.
Kontinua halo instalasaun bee-moos sistema perfurasaunNoa-Ana ba Mahata Noebesi, iha suku Lela-Ufe, sub-rejiaun Nítibe, sei ezekuta hosi kompañia Vitarly Unipesoál Lda ho kustu $143,910,93.
Kontinua halo instalasaun bee-moos sistema perfurasaun Oénunu iha suku Suni-Ufe, sub-rejiaun Nítibe sei ezekuta hosi kompañia Colo Unpesoál Lda ho kustu $46,217.85.
Kontinua halo instalasaun bee-moos sistema bomba iha Liplao Nemun iha suku Taiboko, sub-rejiaun Pante Makasar, sei ezekuta hosi kompañia May Love Star Unipesoál Lda, ho kustu $28,149.25.
Notísia relevante: Abitante 650 iha Kiupanaf RAEOA asesu ona bee-moos
Jornalista: Abílio Elo Nini
Editór: Evaristo Soares Martins
