VIQUEQUE, 02 outubru 2023 (TATOLI)—Autoridade komunitária hosi suku Uaimori, postu administrativu Viqueque Vila, munisípiu Viqueque, hakarak prezensa mídia hodi halo kobertura iha eleisaun suku ne’ebé sei akontese iha loron 28 outubru.
Xefe aldeia Uma-boot, João da Costa Soares, husu ba Governu atu fasilita jornalista mídia estatál hanesan Agência Tatoli, I.P no RTTL, E.P destaka mai suku Uaimori iha tempu eleisaun suku hodi divulga informasaun tanba konsidera suku ne’e izoladu.
“Ami hakarak jornalista nia prezensa iha suku hodi akompaña eleisaun. Se bele Komisaun Nasionál Eleisaun (CNE, sigla portugés) koordena ho Governu hodi destaka ba suku hodi halo kobertura ba eleisaun komunitária,” Autoridade komunitária hato’o kestaun ne’e iha atividade edukasaun sívika, ne’ebé realiza hosi CNE, iha sede suku Uaimori, segunda ne’e.
João da Costa konsidera prezensa mídia importante hodi bele fó sai rezultadu votasaun ba públiku.
“Ami ne’e moris iha suku rurál no dook hosi munisípiu, tanba ne’e ami presiza prezensa mídia iha ami-nia le’et,” nia akresenta.
Notísia relevante : CNE sensibiliza lei eleisaun suku ba abitante Viqueque
Iha fatin hanesan, Komisáriu CNE destakadu Viqueque, Olávio da Costa Monteiro, hateten, durante ne’e mídia sempre halo kobertura iha eleisaun, maski labele kobre iha suku hotu, tanba depende ba planu kobertura iha munisípiu.
“Agora depende mós rekursu mídia ein termu lojístika no transporte ne’ebé bele apoia atividade jornalista sira. Maibé, ha’u sente durante ne’e mídia Viqueque sempre akompaña ami no agora mós mídia RTTL no Tatoli, I.P to’o iha Uaimori no iha fatin hotu, ami konta mós mídia nia prezensa hodi divulga informasaun ba públiku,” nia tenik.
Tuir Komisáriu, CNE mak fasilita hela lojístiku no transporte ba mídia hodi halo kobertura ba edukasaun sívika.
“Bainhira la fasilita sira, dalaruma labele to’o Uaimori tanba presiza transporte maka bele tulun sira-nia viajen. Durante ne’e ami halo edukasaun sívika iha suku sira-ne’e sempre envolve mídia hodi divulga informasaun ba públiku,” nia salienta.
Jornalista : Vitorino Lopes da Costa
Editora : Julia Chatarina
