DILI, 05 outubru 2023 (TATOLI) – Diretór Klíniku iha Hospital Nasionál Guido Valadares (HNGV), Marcelino Correia, dehan pasiente sira moras serviks, hahú agostu to’o setembru, rejista 31 maibé na’in-rua mak deteta afeta kankru serviks.
“Durante agostu to’o setembru, inan sira ne’ebé mak moras serviks iha HNGV iha departamentu jinekolojia no obstretia rejista ema 31, maibé liuhosi atendimentu escrening ida-ne’e deteta na’in-rua mak kankru serviks”, Marcelino Correia dehan ba TATOLI iha nia kna’ar fatin, ohin.
Nia hateten, husi pasiente na’in-rua ne’e ho kazu pozitivu kankru serviks no médiku sira sei haree oinsa mak atu fó tratamentu iha laran ou liur.
“Sei haree iha posibilidade halo tratamentu iha rai liur, ne’e depende ba médiku sira haree nia kauza ne’e to’o iha ne’ebé ona, entaun husi rezultadu ida-ne’e mak ita foin deside, ita nafatin enkoraja ba sira nafatin hodi hakbesik ba fasilidade saúde atu deteta lalais sira-nia moras”, nia relata.
Nia afirma, pasiente sira ne’ebé mak mai halo escrening ne’e maioria ho idade 20 to’o 40, sira mai halo tratamentu iha ne’e no halo diagnosa tuir situasaun ne’ebé mak iha.
“Husi pasiente sira mai ne’e, voluntariamente mai iha sentru ne’e mak ita bele halo detesaun ba moras ida-ne’e, tanba ne ‘e ita enkoraja sira hotu hodi hatene atu sedu liu hodi hakbesik atu hetan tratamentu”, nia revela.
Jornalista : Felicidade Ximenes
Editór : Zezito Silva
