MSSI prevee orsamentu 2024 fó prioridade harii sentru reabilitasaun iha munisípiu
DILI, 06 outubru 2023 (TATOLI)—Ministériu Solidariedade Sosiál no Inkluzaun (MSSI), sesta ne’e, hala’o enkontru ho kargu xefia sira ho objetivu hodi koa’lia kona-ba preparasaun orsamentu ba tinan 2024, hodi submete ba Ministériu Finansa, ho pakote orsamentu tinan 2024 hamutuk $27.o73,251.
Ministra Solidariedade Sosiál no Inkluzaun (Interina), Céu Brites, husu ba diretór sira atu koopera nafatin hodi servisu hamutuk, nune’e bele halo servisu ho di’ak ba komunidade sira ne’ebé presiza fó apoiu, liuliu orsamentu ne’e prevee ba espansaun sentru solidariedade sosiál no harii sentru reabilitasaun iha munisípiu sira.
“Prioridade orsamentu ba tinan 2024 mak tenke preve ba espansaun ba Sentru Solidariedade Sosiál to’o iha postu administrativu, Harii Sentru Reabilitasaun iha munisípiu sira hotu, asuntu diretu ba labarik, asuntu ema ho defisiénsia inklui eroi vivu (idozu sira-ne’ebé atinje ona idade 70 ba leten),” Céu Brites hateten liuhosi nota ne’ebé Agência Tatoli asesu, sesta ne’e.
Diretór Jerál Servisu Korporativ iha MSSI, Guido Recardo Belo, husu ba dirasaun sira atu tetu no prevee orsamentu tuir MSSI nia kbiit ne’ebé mak iha, nune’e bele garante ninia kualidade ezekusaun liuliu oinsá mak bele atinje ninia meta ne’ebé defini ona.
Tanba ne’e, nia husu ba dirasaun sira atu prevee orsamentu tenke tuir kada programa no atividade ne’ebé bazeia ba programa IX Governu Konstitusionál.
Diretór Dirasaun Nasionál Planeamentu, Finansa no Orsamentu iha MSSI, Gil da Cruz, hateten totál orsamentu iha tinan 2023 hamutuk millaun $30 millaun, maibé ba tinan 2024 ne’e MSSI hetan de’it millaun $27.
Tanba ne’e, nia husu ba dirasaun sira atu tetu no koloka orsamentu tuir prioridade programa no atividade ne’ebé mak iha, no tenke tau orsamentu bazeia ba indikador sira no meta hodi nune’e bele halo ezekusaun ho kualidade.
Jornalista : Osória Marques
Editór : Cancio Ximenes
