VIQUEQUE, 08 outubru (TATOLI)- Sekretáriu adiministrasaun munisípiu Viqueque, Teotónio Sarmento da Silva, informa preparasaun ba eleisaun xefe suku tinan 2023 munisípiu Viqueque aloka $226.148,50.
“Preparasaun ba eleisaun suku munisípiu Viqueque iha 36, implementa eleisaun suku 35 no suku Builo maka seidauk implementa eleisaun tanba mandatu xefe suku seidauk to’o no eleisaun ba 2023 proposta orsanentu ba eleisaun suku iha Viqueque nian maka narativu ho montante $226.148,50,” Tetónio informa ba Agência Tatoli, iha postu Viqueque Vila, domingu ne’e.
Nia dehan, eleisaun suku adiministradór fó ona kompeténsia ba diresaun apoia sosiadade sívil hamutuk ho Sekretariadu Tékniku Adiministrasaun Eletorál (STAE) no Komisaun Nasionál Eleisaun (CNE-sigla portugés) organiza eleisaun.
“Preparasaun seluk maka foin lalais ne’e ami konvida estrutura suku sira hodi fó hanoin no oinsa forma meza asembleia suku no aldeia, tanba sira maka nu’udar estrutura iha baze,” nia akresenta.
Munisípiu Viqueque simu ona urna ba eleisaun suku tempu eleisaun besik sei distribui ba suku hodi aloka ba kada aldeia ne’ebé realiza eleisaun.
“Ami fiar katak eleisaun suku ba tinan ida-ne’e sei susesu tanba eleisaun prezidensiál no parlamentár la’o susesu, ne’ebé ami garante eleisaun ida-ne’e sei susesu,” nia katak.
Nia dehan, eleisaun suku munisípiu no postu sei responsabiliza hamutuk STAE no CNE organiza eleisaun sai di’ak liután.
“Nune’e ha’u husu ba eletór munisípiu Viqueque tenke partisipa eleisaun suku hodi hili ita-nia lideransa suku no aldeia sira iha loron 28 fulan-outubru 2023,” nia sujere.
Jornalista : Vitorino Lopes da Costa
Editór : Evaristo Soares Martins
