BALI, 11 outubru 2013 (TATOLI)–Primeiru-Ministru (PM), Kay Rala Xanana Gusmão, hateten, Timor-Leste no Indonézia presiza buka atu finaliza asuntu fronteira marrítima hodi kombate peska ilegál.
“Agora ami buka atu finaliza fronteira marrítima, ami ho Indonézia ho espíritu hamutuk no kooperasaun. Depois de ami finaliza negosiasaun ho Indonezia, ami sei bele haree projetu peska sustentável sira iha tasi no ajuda ami hapara peska ilegál ne’ebé destrui ami-nia biodiversidade,” Archipelagic and Island States Forum (AIS Forum) ka Fórum Nasaun Arkipelájiku no Illa ba dahuluk, ne’ebé hala’o iha Sentru Konvensaun Nusa Dua Bali (BNDCC, sigla inglés), Indonézia, kuarta ne’e.
Notísia relevante : AIS Forum, Xanana manifesta Timor-Leste vulnerável ba mudansa klimátika
Xanana haktuir, Timor-Leste ramata ona negosiasaun ho Austrália, liuhosi prosesu konsellu ida ne’ebé obrigatóriu iha United Nations Convention on the Law of the Sea (UNCLOS).
“Ami mós kolabora ho Indonézia atu estabelese parke fuzileiru ba jestaun sustentável ba ami-nia tasi,” nia akresenta.
Aleinde ne’e, Timor-Leste no Indonézia lokaliza iha triángulu ahu-ruin, ne’ebé hanesan área ho biodiversidade biolójiku mariñu a’as liu iha mundu. Tanba ne’e iha inisiativa sira atu harii zona sira hanesan AIS Blue Hub, sentru peskiza no dezenvolvimentu inklui índise dezenvolvimentu ekonomia.
Iha parte seluk, illa Ataúru ne’ebé dook kilómetru 30 hosi kapitál Dili simu bee biodiversu balun iha mundu.
“Timor-Leste estabelese ona Sentru Peskiza no Edukasaun Mariñu ida iha illa Ataúru no prepara hela atu deklara bee sira ne’ebé haleu illa parke nasionál ida,” nia relata.
Jornalista : Antónia Gusmão
Editora : Julia Chatarina
