COVALIMA, 13 outubru 2023 (TATOLI) – Ana Maria Pereira, feto potensiál ida iha suku Camanasa Postu Administrativu Suai, munisípiu Covalima, submete ona dokumentu ba meza asembleia suku hodi kandidata aan ba iha eleisaun komunitária ne’ebé realiza iha 28 outubru.
Tanba hakarak halo mundansa ba nia suku, Ana nia kandidatura ne’e hetan apoia másima husi nia família sira. “Bainhira povu fó fiar ha’u sei halo dezenvolvimentu iha ha’u-nian suku”, Ana Pereira promete hafoin aprezenta nia dokumentu iha suku Camanasa, ohin.
Tuir observasaun Ana Pereira, iha lideransa sira antes iha suku Camnasa lahalo mudansa, tanba ne’e ho nia motto ‘Ha’u sei tane no hakous rai Camanasa’ fanu nia hakarak halo buat foun.
Prioridade ne’ebé mak nia hakarak halo mak presta atensaun ba joven sira dezempregadu iha suku no hakbiit feto maluk sira.
Antes nia kandidata aan ba lidera suku, Ana Maria mós hanesan sai delegada, membru Komité Planeamentu no Akuntabilidade iha suku no xefe grupu feto foinsa’e. Nia mós partisipa formasaun kona-ba violénsia bazeia ba jéneru hodi reprezenta feto potensiál iha munisípiu.
Daudaun ne’e, iha suku Camanasa, meza asembleia rejista kandidatu xefe suku nain-neen ne’ebé kompostu husi mane lima no feto ida.
Kritéria atu kandidata ba xefe suku hanesan timoroan ho idade 17 ba leten, halo ona reseamentu eleitorál no hela duni iha suku no presiza rekizitu mak hanesan fotokópia kartaun eleitorál tahan 2, foto koloridu 3×4 tahan 2, prienxe formuláriu aseitasaun kandidatura, aprezenta lista apoiante 1% husi eleitór suku ne’ebé kandidata aan ba no fotokópia kartaun eleitorál apoiante sira.
Meza asembleia hahú halo atendimentu hodi rejista kandidatu xefe suku sira iha ida-idak nia sede hahú iha 10h00 no remata iha 13h00.
Tuir dadus, suku Camanasa iha nia totál eleitór hamutuk 3.079, mane 1.583 no feto 1.496.
Jornalista: Celestina Teles
Editora: Maria Auxiliadora
