BOBONARO, 19 outubru 2023 (TATOLI)- Faustina da Silva Maia, kandidatu Xefe suku ida entre kandidatu feto na’in 12 ne’ebé sei partisipa iha Eleisaun komunitáriu ne’ebé sei realiza iha 28 outubru tinan ne’e.
Tuir lista kandidatura hosi meza asembleia suku 50 ne’ebé Sekretariadu Tékniku Administrasaun Eleitorál (STAE) munisípiu Bobonaro simu, iha loron 13 fulan-ne’e, kandidatu Faustina da Silva Maia, nu’udar xefe aldeia, deside atu kompete atu sai xefe suku Ritabou, postu administrativu Maliana ba périodu 2023-2030.
Razaun tuir Faustina da Silva Maia, demokrasia mak motiva nia deside kandidata aan ba xefe suku atu luta maka’as liu ba promove igualde jéneru hodi tane aas feto sira nia dignidade hanesan ho mane sira, tanba Estadu ho governu mós fó prioridade liubá feto sira atu lidera suku iha périodu sira tuirmai.
Notísia relevante:Feto 12 iha Bobonaro sei kompete ho mane sira iha eleisaun lideransa komunitária
“Ha’u tau prioridade barak liubá feto tanba ita haree fila komunidade feto sira enfrenta maka laiha igualdade jéneru, ida ne’e mak ha’u mai kandidata-an, tanba prioridade ba suku envolve barak liu mak mane; feto ladun hetan oportunidade partisipa iha dezenvolvimentu suku,” nia informa ba jornalista sira, iha edifísiu STAE munisípiu Bobonaro,kinta ne’e
Programa Prinsipál ne’ebé atuál xefe aldeia Halecou ne’e tau prioridade mak hanesan ba dahuluk promove kultura no igualdade jenéru, koordena ho governu kona-bá programa suku nian, hakbiit ekonomia komunidade, grupu kreativu sira inklui mós ba família vunerável sira.
Alende ne’e, programa seluk mak hanesan, tau-matan ba feto-faluk no oan-ki’ak sira, ema ho defísiensia no mellora administrasaun suku ho onestu.
Prioridade hirak ne’e inan feton Faustina hili, tanba prosesu dezenbolvimentu ne’ebé hatuur durante ne’e, seidauk responde ba nesesidade komunidade sira nian, no kondisaun ne’e akontese fó de’it benefísiu barak liu ba fámilia no grupu ki’ik sira.
“Ko’alia kona-bá dezenvolvimentu ita bele dehan, nu’udar prosesu ou esforsu ida ne’ebé atu hadiak buat ne’ebé la di’ak, ba di’ak liután no hamosu buat ne’ebé foun ba moris di’ak komunidade nia,” nia garante.
Durante asume kargu hanesan xefe aldeia hahú iha tinan 2017 to’o 2023 ne’e, populasaun na’in 600-resin ho totál uma-kain 144, Faustina halo ona buat balun hanesan, apoia programa kona-bá inan isin-rua sira oinsá atu aseu ba iha fasilidade saúde, asesu ba estrada no seluktan.
Alende ne’e iha fulan marsu liubá Faustina mós hetan konfiansa hosi vendedora na’in-60 iha merkadu Maliana hodi asume pozisaun hanesan Koordenadora Asosiasaun Vendedora merkadu iha Bobonaro ne’ebé hetan apoia hosi projetu To’os ba Moris Diak (TOMAK) ho objetivu kria ambiente seguru ba vendedora feto, labarik feto sira no Ema ho defísiensia sira.
Asosiasaun ne’e estabelese atu sai ponte no espellu ba vendedora sira hodi aprezenta sira-nia preukupasaun no difikuldade ba governu.
Ho esperiénsia naton ne’e halo Faustina la rende hodi luta maka’as liutan tuir mehi ne’ebé hakarak atinje mak dezenbolve suku Ritabou no hadi’a povu nia moris.
“Hau-nia lia-menon ba povu suku Ritabou katak ha’u mai hanesan ita-boot sira-nia oan, hanesan suku ida ne’e nia jerasaun, atu mai dezenvolve ita-nia suku, la’ós atu destroi ita-nia suku tanba ita-nia kultura no kustume suku nia iha nanis ona dezde avó sira-nia tempu,” nia dehan.
Feto Potensiál ne’e promete bainhira nia la eleitu hosi povu, sei koordena no kontribui kapasidade tomak atu servisu hamutuk ho xefe suku eleitu.
Enkuantu, Fautina da Silva Maia, sei kompete ho kandidatu mane na’in lima, hanesan Maximiano dos Santos Araújo, Florindo Lesu Berre, Hernanio Deolindo de Araújo,Longuinhos Berre no Raimiro Mau-Buti.
Entretantu, totál eleitór iha suku Ritabou hamutuk 4,605 ne’ebé mai hosi aldeia 12 hanesan Halecou, Samelau, Daitete, Uat, Timatan, Riti-Udu, Ritabou, Korluli, Diru Aben, Maganutu, Mole-Anan no Mahui.
Notísia relevante:CAUCUS nota feto entuziasta hodi kandidata-aan ba xefe suku
Jornalista: Sergio da Cruz
Editór: Rafael Ximenes de A. Belo
