DILI, 24 outubru 2023 (TATOLI) – Asosiasaun Espoza/u Polísia Nasionál Timor-Leste (AESPNTL) ne’ebé harii iha 21 abríl 2023 mai ho vizaun mak hamahon parseiru no parseira sira hodi moris iha naroman no unidade no ho misaun maka sei apoia maka’as ba parseiru sira membru PNTL iha terrenu.
AESPNTL nia objetivu mak tulun membru PNTL mane sira, hala’o atividade sosiál bá iha ospitál sira, iha área edukasaun nomós atividade ekonómika nian.
Asosiasaun estabelese ho intensaun atu serbisu hamutuk ho Estadu, parseiru dezenvolvimentu husi nasionál no internasionál no igreja, nune’e bele hadi’ak liután instituisaun PNTL.
Ministru Interiór, Francisco Guterres, louva PNTL tanba harii ona AESPNTL ho intensaun atu ajuda membru PNTL sira dezenvolve aan iha futuru.
“[Asosiasaun] bele ajuda membru PNTL sira hodi bele hala’o sira-nian serbisu ho di’ak. Husi AESPNTL ne’e rasik sei lori susesu mai iha PNTL. Durante ne’e, membru PNTL mane sira dalabarak enfrenta problema oioin iha sira-nian atividade no lahetan solusaun. Ho prezensa AESPNTL ne’e bele motiva mane [PNTL] sira”, governante dehan iha sentru formasaun PNTL Comoro, ohin.
“Ema matenek sira dehan bainhira mane sira atu hetan susesu, sempre hetan akompañamentu feto ida iha sira-nian kotuk. Katak bainhira mane ida atu hakat bá oin hodi hadi’a ninia karreira iha PNTL tenke iha feto ida ne’ebé matenek, iha vizaun hodi fó apoiu”, dehan.
Tanba ne’e, ministru promete katak sei disponibiliza karreta iha tinan oin hodi tulun asosiasaun nia atividade sosiál sira ne’ebé halo bazeia ba planu no programa sira ne’ebé maka AESPNTL aprezenta ona.
Komisáriu PNTL, Henrique da Costa, admite katak prezensa AESPNTL ne’e importante duni hodi tulun membru sira atu dezenvolve sira-nian aan nu’udar polísia ida profisionál.
“Ha’u seidauk bele promete buat ida, maibé ha’u sei halo esforsu hakmaan difikuldade ne’ebé maka AESPNTL enfrenta”, realsa.
Iha sorin seluk, Prezidente AESPNTL, Manuela de Araújo, salienta asosiasaun nia programa iha setór saúde mak sei vizita sentru saúde sira hodi fó apoiu morál ba moras sira, liuliu inan no feton sira ne’ebé maka hetan moras grave, nune’e sira labele sente mesak no fó brani ba sira hodi enfrenta moras sira ne’e.
Nia mós haktuir katak programa sira ne’ebé maka AESPNTL trasa ona seidauk hetan apoiu ida. AESPNTL hamriik ho ninia esforsu rasik hodi buka fundu liuhusi maneira
“Ho promesa Ministru Interiór atu apoia karreta ida no sei tau osan ba asosiasaun ne’e bele hakmaan difikuldade ne’ebé maka AESPNTL enfrenta iha futuru no sei dezenvolve di’ak liután AESPNTL sai asosiasaun ida ne’ebé kualidade”, garante.
Jornalista: Tomé Amado
Editora: Maria Auxiliadora
