DILI, 26 outubru 2023 (TATOLI) – Ministériu Saúde (MS) liuhosi Diretora Nasionál Nutrisaun, Natalia dos Reis de Araujo Moniz, hateten MS hamutuk ho Institutu Nasionál Farmasia no Produtu Medikamentu (INFPM) distribui ai-han nutritivu iha novembru ba fasilidade saúde iha territóriu nasionál.
“Semana oin fulan novembru mak ita halo distribuisaun ai-han nutritivu planpinat ba kada fasilidade saúde iha territóriu nasionál tanba bainhira ita distrbui bazeia ba relatóriu kazu má nutrisaun ne’ebé mak iha”, Natalia dos Reis de Araujo Moniz, dehan ba TATOLI iha nia kna’ar fatin MS Caicoli, ohin.
Nia esplika, atu halo distribuisaun ba ai-han nutrisaun,planpinat de depende ba relatóriu kada fulan iha fasilidade saúde, kona-ba relatu kazu má nutrsaun hira mai iha nasionál.
Nia dehan, kazu má nutrisaun ne’e bazeia ba médiku sira halo atendimentu iha internamentu ba tratamentu labarik na’in-lima, entaun distribui tuir númeru sira ne’ebé mak iha, atu labele estraga ai-han ida-ne’e iha munisípiu sira.
“Ezemplu iha munisípiu, ita fó kaixa 30, ida-ne’e mak sira fahe fali ba kada sentru saúde no mós postu saúde, ita labele fó barak liu maibé ita fó tuir relatóriu ne’ebé mak iha, se lae fatin ladún di’ak depois estragu iha ne’eba”, nia informa.
Sorin seluk, Diretór Ezekutivu INFPM, Brigido Simão Dias, hateten INFPM sei hein konfirmasaun husi Ministériu Saúde hafoin halo distribuisaun ai-han nutritivu ba kada fasilidade saúde iha territóriu nasionál.
“Ai-han nutrisaun ida-ne’e tama hamutuk ho medikamentu sira iha loron 17 fulan outubru no sei rai hela iha armajen tanba ita-nia funsaun atu simu rai depois halo distribuisaun ba kada fasilidade maibé ita sei hein konfirmasaun husi departamentu nutrisaun”, Dias konklui,
Notísia relevante : Setembru : Sentru Saúde Vera Kruz deteta má nutrisaun moderadu 80 no grave 37
Governu Reinu Unidu apoia millaun $1 resin ba MS kombate má nutrisaun
PPN-UNICEF diskute problema mortalidade-má nutrisaun ba labarik iha TL
Jornalista : Felicidade Ximenes
Editór : Zezito Silva
