iklan

BOBONARO, ELEISAUN, HEADLINE, MUNISÍPIU, POLÍTIKA

La tempu ona realiza Eleisaun Suku ho sistema manuál

La tempu ona realiza Eleisaun Suku ho sistema manuál

CNE Munisípiu Bobonaro halo enkontru ho autoridade munisípiu, autoridade seguransa no defeza no entidade relevante sira, halo avaliasaun eleisaun suku primeiru volta. Imajen Tatoli/Sérgio da Cruz.

BOBONARO, 10 novembru 2023 (TATOLI) – Kandidatu Xefe suku Tapo-Memo, postu administrativu Maliana, Munisípiu Bobonaro, Fernando Raul, hateten agora la tempu ona atu halo atendimentu ba eleitór sira ho sistema manuál, tanba Timor-Leste ukun-aan tinan 20-resin ona iha instituaun estadu sira maioria utiliza ona sistema dijitál hodi fasilita atendimentu públiku.

Nia hato’o asuntu ne’e iha atividade avialiasaun ba realizasaun Eleisaun Suku volta dahuluk no preparasaun ba eleisaun volta daruak ne’ebé realiza hosi Komisaun Nasionál Eleisaun (CNE, sigla portugués), munisípiu Bobonaro, sesta ne’e.

Atuál xefe aldeia Tunubibi ne’e observa iha eleisaun priemira volta iha 28 outubru liubá, iha sentru votasaun balu eleitór sira forma naruk no balu to’o konsege ezerse direitu votu, tanba sekretaria meza asembleia aldeia iha ema ida de’it tenke hakerek ho liman totál eleitór nia naran.

Notisia relevante: Laiha fatin vota, STAE Bobonaro instala tenda 42

“Hau fó ezemplu iha ha’u-nia aldeia eleitór mai vota iha 476, atu atende eleitór sira-ne’e, ema ida de’it, nia tenke tuur hosi tuku 09:00 to’o tuku 15:00 lokraik, ita-boot sira-nia sentimentu umanu ne’e iha ne’ebé? ita atu fó sala ba sé, estadu iha, nasaun iha atu hadi’ak buat sira-ne’e, tanba la’ós ona tempu atu uza sistema manuál, ida hakerek ho liman ne’e, agora modernu, buat hotu fasil, hein print de’it loos ona,” nia hateten iha salaun CNE, Soso, Maliana.

Nia husu ba STAE liuliu governu atu aumenta númeru Pesoál STAE Apoia Aldeia (PSSA) iha eleisaun segunda volta, nune’e bele subtitui malu bainhira ida hakerek kolen.

Nia akresenta, bainhira la halo mudansa lei eleisaun suku, iha segunda volta ne’e sei akontese tán dala-ida ba povu atu forma naruk to’o kalan boot.

“Ita mai mak ko’alia lei deit, maibé ita la kompriende katak durante ne’e ita ne’e sai vítima ba lei ne’e rasik, lei nunka asegura ita, lei ne’e hatama ema iha infernu, lei mak haruka kastigu ema na’in-tolu ba loron tomak, sera ké lei ida-ne’e ita labele halo mudansa, sé ita troka maluk took, sira mak ba tuur iha-ne’ebá, maun boot sira mai tuur fali tok, fó $100 de’it kasian,” nia afirma.

Xefe suku Ritabou, Maximiano dos Santos Araújo, reforsa ho mekanizmu ne’ebé halo iha eleisaun liubá, eleitór iha suku Ritabou hamutuk 1,526 mak la vota.

Liga ho problema ne’e, kandidatu xefe suku ne’e mos husu ba Ministériu Administrasaun Estatál ba futuru atu altera leí númeru 09/2016.

“Ita hela loron ida rua de’it ona atu hadia lei ne’e, imposivel, maibé presiza hadi’ak buat balu, aánba ha’u-nia komunidade Uat-Kaboke no Maganutu ne’e barak hela iha vila, bele ka lae, ita kria buat balu iha ne’e atu sira bele mai vota hotu, tanba sira hela dook selu ojek to’o Bobonaro, ha’u hanoin sira baruk,” nia sujere.

Prezidente Meza Asembleia Aldeia Genuhan, suku Lahomea, Alfredo Caetano, konkora presiza muda lei suku ne’e, tanba povu barak preokupa eleisaun liubá ne’e laiha kualidade.

“Loloos ita atu ba eleisaun, la’ós ba halo resensiamentu eleitorál, tanba eleisaun ne’e kontráriu, ita ba sei fó kartaun eleitorál, rejistu fali depois mak ita ba vota, maibé loloos rejistu ne’e resensiamentu eleitorál ita halo tiha ona, depois mak ita ba eleisaun, tanba ne’e mak ami rekomenda ba CNE atu hato’o paresér ida ba governu, tinan 7 mai altera tiha lei ne’e,” nia rekomenda.

Biban ne’e, Diretór STAE Munisípiu Bobonaro, Maríano Viegas Amarál, rekonese katak iha eleisaun primeira volta mosu lamentasaaun no krítika hosi autoridade lokál, eleitór no entidade oinoin.

Maibé nia klarifika katak, tuir lei iha eleisaun suku STAE hansan órgaun eletorál ne’ebé fó deit apoia tékniku tanba prosesu tomak autoridade munisípiu no administrador postu sira mak organiza.

Nia dehan, STAE labele aumenta númeru PSAA tanba lei mak hatete ema na’in-tolu de’it mak servisu iha meza asembleia aldeia.

“Ami ba oin kona, ba kotuk kona. Ezemplu hakarak fasilita lalais, tau na’in lima ka neen, ne’e la tuir ona lei, sala nafatin, agora ema na’in-tolu ne’e lei mak hatete. Ida sai Prezidente Meza, ida sai Sekretáriu Meza, ida sai Eskoltinadór, ita labele aumenta tuir ita-nia hakarak, tanba lei ita-nia polítiku sira seidauk altera leí ne’e,” Diretór STAE Bobonaro fundamenta.

Enkuantu suku ne’ebé sei avansa ba segunda volta iha munisípiu Bobonaro hamutuk 27 ho totál kandidatu na’in-54 mak sei kompete iha 13 novembru.

Notísia relevante: CNE Bobonaro identifika erru barak mosu iha eleisaun suku

Jornalista: Sérgio da Cruz

Editór: Evaristo Soaares Martins

iklan
iklan

Leave a Reply

iklan
error: Content is protected !!