Molok altera Lei Suku, CNE sei husu Governu rona opiniaun hosi baze
OÉ-CUSSE, 10 novembru 2023 (TATOLI) – Komisaun Nasionál Eleisaun (CNE, sigla portugés) sei propoin ba Governu no Parlamentu Nasionál, atu konsulta ho komuniddae sira kada munisipíu hafoin halo alterasaun ba Lei númeru 9/2016, Lei Suku nian.
Notísia relevante: MAE no CNE rekoñese eleisaun suku volta dahuluk akontese erru barak
Vise-Prezidente CNE, Domingos Barreto, hato’o asuntu iha enkontru avaliasaun ho entidade sira iha rejiaun Oé-Cusse Ambeno, sesta ne’e.
“Ohin ita hotu ko’alia, fó ona sujestaun, ideia, ho hanoin ida de’it katak, hotu-hotu hakarak halo alterasaun ba Lei Suku, númeru 9/2016, preokupasaun sira ohin ne’e, atu rezolve, maka liuhosi alterasaun lei ne’e, ne’ebé CNE sei lori preokupasuan sira-ne’e ba iha plenária depois rekomenda ba Governu atu halo alterasaun tenke konsulta to’o baze,” Vise-Prezidente CNE, Domingos Barreto hateten.
“Bainhira atu halo alterasaun ba Lei Suku ne’e, atu altera labele tur de’it iha nasionál, tanba sira la hetene problema iha baze, entaun konsulta tún to’o kraik, envolve mós xefe sukun sira, ne’e mak atu halo alterasaun bele refleta sentidu povu ki’ik sira iha terrenu, ne’ebé preokupasaun sira ohin ita-boot sira hato’o kona-bá problema barak iha eleisaun suku,” nia argumenta.
Tán ne’e autoridade orgaun eleitorál ne’e, apela ba entidade hotu iha Rejiaun Oé-Cusse, atu koopera no servisu hamutuk atu garante eleisaun suku volta daruak la’o ho susesu.
“Eleisaun segunda ronda sei akontese iha segunda, atu susesu, hanesan CNE husu ita hotu nia kolabrasaun, mekanizmu balu STAE ho CNE toman ona, presiza apoia ba malu tanba ema hotu hakarak eleisaun ne’e tenki la’o di’ak,” nia fó hanoin.
notisia relevante; Eleisaun suku laiha tinta, eleitór sira bele vota doubru
Entretantu, iha eleisaun volta daruak, suku sia (9) ho kandidatura na’in-18 mak kompete iha hanesan, iha sub-rejiaun Nítibe suku Ban-Afi, kandidatu José Lalus kompete ho kandidatu José Seko, suku Lela-Ufe kandidatu José Neno Sila kompete ho kandidatu José Poto.
Iha sub-rejiaun Oésilo suku Usitasa’e kandidatu Liberatu Punef kompete ho kandidatu Tomás Ulan Colo, no iha sub-rejiaun Pante Makasar, suku Costa kandidatu Aleixo Abi kompete ho kandidatu Francisco Colo, suku Lifau kandidatu Delfino Soares kompete ho kandidatu Raimundo Abi.
Nune’e mós iha suku Naimeko, kandidatu Emanuel Teme kompete ho kandidatu Marcos Liu, suku Nipani kandidatu Luis Pasquela Meko kompete ho kandidatu Pedro Neno Seu Eko, suku Taiboko kandidatu Joaquim Tafin kompete ho kandidatu Meteus Naz no iha sub-rejiaun Pássabe maka suku Abani kandidatu Carlos Elo kompete ho kandidatu Leonardo da Cunha.
Notísia relevante:Eleisaun suku ho sistema manuál, MAE sei hadi’a iha segunda ronda
Jornalista: Abílio Elo Nini
Editór: Evaristo Soares Martins
