MAE apresia maturidade povu Oé-Cusse iha Eleisaun Suku volta dahuluk
OÉ-CUSSE, 11 novembru 2023 (TATOLI) – Ministériu Administrasaun Estatál (MAE), liuhosi Diresaun Jerál Desentralizasaun Governu Lokál, parabeniza maturidade povu iha Rejiaun Administrativa Espesiál Oé-Cusse Ambeno (RAEOA), tanba ambiente pás estabilidade iha realizasaun eleisaun orgaun suku volta dahuluk.
Notísia relevante: MAE no CNE rekoñese eleisaun suku volta dahuluk akontese erru barak
Diretór Jerál Desentralizasaun Governu Lokál iha MAE, António Guterres, reprezenta Ministériu Administrasaun Estatál, hato’o nia sentimentu ksolok ne’e iha ámbitu enkontru avaliasaun eleisaun volta dahuluk iha eskritóriu CNE Oé-Cusse, sesta ne’e.
“Inisíu preparasaun eleisaun iha ámbitu hala’o eleisaun primeru ronde, ha’u reprezenta Ministériu Administrasaun Estatál lahetan no la rejistu buat balu kona-bá irregularidade ne’ebé komete iha área sirkunstánsia RAEOA nian,” nia apresia.
“Tan ne’e povu Oé-Cusse merese atu elojia no kongratula, liuliu komponente Estadu nian, hahú hosi Autoridade RAEOA liuhosi Sekretáriu Rejionál ba Asuntu Administrasaun, PNTL F-FDTL, PNDJ hamutuk ho CNE no STAE, tanba imi presta ona atensaun ba supervizaun tékniku ba eleisaun liu ona,”
Guterres parabeniza ba povu Oé-Cusse, tanba atinje 50% iha eleisaun volta dahuluk, hela 50% atu kompleta tán 100%, tanba iha Oé-Cusse suku 18, maibé suku sia (9) eleitu ona nia lideránsa komunitáriu ho nia órgaun suku kompletu, hela suku sia (9) maka hakat ba volta daruak.
“Iha eleisaun volta daruak ne’e direfenti uluk sura atu manán tenke atinje 50%+1, maibé ba volta daruak la’e, agora buka de’it maioria simples, semak liu nia mak eleitu la presiza ona 50%+1,” nia katak.
Notísia relevante: Eleisaun suku laiha tinta, eleitór sira bele vota doubru
Entretantu, iha eleisaun volta daruak, suku sia (9) ho kandidatura na’in-18 sei kompete hanesan, iha sub-rejiaun Nítibe suku Ban-Afi, kandidatura José Lalus kompete ho kandidatura José Seko, suku Lela-Ufe kandidatura José Neno Sila kompete ho kandidatura José Poto.
Iha sub-rejiaun Oésilo suku Usitasa’e kandidatura, Liberato Punef kompete ho kandidatura Tomas Ulan Colo, no iha sub-rejiaun Pante Makasar suku Costa kandidatura, Aleixo Abi kompete ho kandidatura Francisco Colo, suku Lifau kandidatura, Delfino Soares kompete ho kandidatura Raimundo Abi.
Nune’e mós iha suku Naimeko, kandidatura Emanuel Teme kompete ho kandidatura Marcus Liu, suku Nípani kandidatura, Luis Pasquela Meko kompete ho kandidatura Pedro Neno Seu Eko, suku Taiboko kandidatura, Joaquin Tafin kompete ho kandidatura Meteus Naz no iha sub-rejiaun Pássabe maka suku Abani kandidatura, Carlos Elo kompete ho kandidatura Leonardu da Cunha.
Notísia relevante: Molok altera Lei Suku, CNE sei husu Governu rona opiniaun hosi baze
Jornalista: Abílio Elo Nini
Editór: Evaristo Soares Martins
