OÉ-CUSSE, 13 novembru 2023 (TATOLI) – Fransisco Colo, nu’udar kandidatu foun eleitu ba xefe suku Costa iha sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), hafoin hetan vitória iha eleisaun órgaun suku volta daruak, segunda ne’e.
“Agradese ba konfiansa eleitór sira iha suku Costa aldeia lima, tanba fó ona sira-nia fiar mai ha’u atu lidera suku Costa ba tinan hitu, ha’u sei tau matan ba povu iha aldeia lima iha suku Costa, nu’udar suku ida iha Oé-Cusse vila, durante ha’u nia mandatu,” Fransisco Colo, ba Agência Tatoli iha sentru votasaun Masin Oé-Cusse.
Notísia relevante: Tomas Ulan re-eleitu lidera suku Usitasa’e períodu 2023-2030
Atu rekorda fali fali katak, iha eleisaun orgaun suku volta dahuluk, kandidatu xefe suku Costa hamutuk na’in-ualu inklui feto ida hanesan, Abelino Lobato, Agustinho da Costa, Aleixo Abi Bendito da Conceição, Francisco Colo, Job Romeio da Cruz Salu, Paulina Abi no Rogerio Landos.
Maibé kandidatu Aleixo Abi, nu’udar xefe suku atuál ho kandidatu Francisco Colo, maka hetan votu barakliu maibé la atinje votu ho 50%1, nune’e kandidatu na’in-rua ne’e avansa eleisaun suku volta daruak.
“Ha’u hetan votu maioria simples hamutuk 2.451, ha’u-nia advesáriu hetan votu 2.425, ne’ebé ha’u liu votu 26,” Francisco Colo, informa.
Tuir dadús Agência Tatoli asesu iha prezidente meja sentru votasaun Masin katak, iha suku Costa aldeia lima Francisco Colo manán iha aldeia Sanane ho votu 1517, no aldeia Quinat ho votu 168, lakon iha aldeia Mahata ho votu 295, lakon aldeia aldeia Oésono ho votu 266 no Leolbatan ho votu 149.
Purtantu, kandidatu Aleixo Abi, manán iha aldeia Leolbatan ho votu 160, no aldeia Mahata ho votu 375, no aldeia Oésono hetan votu 467, maibé lakon iha aldeia Quinat ho votu 168, no aldeia Sanane ho votu 1.255.
Entretantu, totál eleitór iha suku Costa hamutuk 9.706, komposta hosi aldeia lima, hanesan aldeia Lakufoan 626, aldeia Mahata 1.161, Oésono 1.395, Oétfo 614 no aldeia Sanane hamutuk 5.910.
Notísia relevante: Aleixo Abi re-kandidata ba xefe suku Costa
Entretantu, tuir observasaun Agência Tatoli, sentru votasaun sira iha suku Costa hamutuk lima koloka ba aldeia lima, Mahata, Masin, Oésono, Quinat no Oétfo, no sentru votasaun sira hahú loke iha tuku 09:00 dadersan termina iha tuku 15:00 lorokraik, tanba laiha eleitór forma iha liña.
Durante realizasaun eleisaun orgaun suku volta daruak ne’e, hetan seguránsa hosi Polísia Nasionál Timor-Leste, no supervisaun hosi Komisaun Nasionál Eleisaun (CNE, sigla portugés) Provedória Direitu Umanu no Justisa (PDHJ) no hetan akompaña téknika hosi Sekretáriu Tékniku Administrasaun Eleitorál (STAE).
Notísia relevante: Xefe suku foun sei simu pose iha 28 novembru no simu motorizada foun iha 2024
Jornalista: Abílio Elo Nini
Editór: Evaristo Soares Martins
