OÉ-CUSSE, 13 novembru 2023 (TATOLI) – Eis xefe suku Usitasa’e, iha sub-rejiaun Oésilo, Rejiaun Administrativa Espesiál Oé-Cusse Ambeno (RAEOA), ho númeru sorteiu rua (2), Tomas Ulan Colo, segunda ne’e re-eleitu hodi lidera-tán suku Usitasa’e ba períodu tinan hitu 2023-2030 hafoin hetan vitória iha eleisaun órgaun suku volta daruak ne’e.
Tomas Ulan Colo, hetan konfiansa hosi povu suku Usitasa’e ho totál votu 940 no nia advesáriu Liberato Punef hetan votu 912.
“Kandidatu númeru rua (2), Tomas Ulan Colo, mak manán, eis xefe suku re-eleitu, nia manán ho votu 28,” informa, Pesoál STAE Apoi Suku iha sentru votasaun Pune, António do Santos Quefi, ba Agência Tatoli.
Notísia relevante:Valoriza kultura no hametin pás, sai prioridade ba kandidatu Liberato Punef
Totál eleitór iha suku Usitasa’e hamutuk 2.890 mane 1.470 no feto 1.420 mai hosi aldeia tolu, aldeia Sifin hamutuk 809 mane 420 no feto 389, aldeia Pune hamutuk 1.011 mane 497 no feto 514, aldeia Buqui hamutuk 1.070 mane 553 no feto 517.
“Iha rezultadu eleisaun, Tomas Ulan Colo, manán iha aldeia Sifin 300 no aldeia Buqui 458 no lakon iha aldeia Pune ho votu 182, ba fali kandidatu Liberato Punef, manán iha manán iha aldeia Pune ho votu 409, lakon iha aldeia Sifin 240 no Buqui 263, ne’eb’e diferénti votu ualu,” Pesoál STAE Apoi Suku, afirma.
Notísia relevante:Sentru votasaun Usitasa’e Oé-Cusse hahú kontajen
Tuir observasaun Agência Tatoli, sentru votasaun sira iha suku Usitasa’e hamutuk tolu koloka ba aldeia tolu, Pune, Sifin no Buqui, no hahú votasaun iha tuku 09:00 dadersan termina iha tuku 15:00 lorokraik, bainhira laiha eleitór forma iha liña.
Durante realizasaun eleisaun orgaun suku volta daruak ne’e, hetan seguránsa hosi Polísia Nasionál Timor-Leste, no supervisaun hosi Komisaun Nasionál Eleisaun (CNE, sigla portugés) no oberva mos hosi Sekretáriu Tékniku Administrasaun Eleitorál (STAE).
Notísia relevante: PR Horta sei promulga alterasaun lei eleitorál ba Parlamentu Nasionál
Jornalista: Abílio Elo Nini
Editór:Evaristo Soares Martins
