VIQUEQUE, 15 novembru 2023 (TATOLI)-Prezidente komisaun ba eleisaun suku iha munisípiu Viqueque, atuál diretór apoia sosiedade sívil, Cosme Sarmento, informa, eleisaun komunitária ba 2023-2030, feto potensiál hosi munisípiu Viqueque hamutuk na’in-21 kandidata aan ba xefe suku maibé la iha ida mak povu la fó konfiansa hodi lidera suku.
“Iha eleisaun komunitária ne’ebé foin lalais ita hala’o ita-nia feto poténsia sira hamutuk na’in-21 maka kandidata an ba xefe suku, maibé rezultadu hatudu iha eleisaun dauluk no eleisaun daruak iha munisípiu Viqueque laiha feto iha ida maka hetan fiar hosi povu, signifika povu la fó konfiansa ba feto hodi lidera suku”, Cosme Sarmento, hateten ba Agência Tatoli, iha postu Viqueque Vila, kinta ne’e.
Cosme hatutan, hosi períodu 2016 to’o 2023 munisípiu Viqueque xefe suku feto ida hosi suku Bibileo, postu Viqueque Vila, maibé iha períodu 2023 to’o 2030 xefe suku feto ne’e lakon ho mane.
“Iha tinan 2016 to’o 2023 ne’e ita munisípiu Viqueque feto ida maka nu’udar xefe suku Bibileo, nune’e foin lalais nia kontinua kandidata an ba xefe suku ba eleisaun dauluk nia laliu ba barreira hodi tama ba eleisaun daruak ho mane ida. Maibé rezulta votasaun 13 novembru lakon ho mane”, nia haktuir.
Nune’e nia fó korajen ba kandidata feto sira maske ba eleisaun komunitária ba períodu ida-ne’e feto lakon, maibé nafatin iha kompromisu no prepara aan atu eleisaun 2030 bele kandidata aan ba xefe suku.
“Ha’u hanoin feto nafatin iha korajen. Ba kandidata feto sira-ne’ebé kandidata aan ona ba xefe suku, maibé lakon, maske lakon labele lakon vontade nafatin iha komitmentu no nafatin iha vontade aprende hodi prepara aan di’ak liu tan nune’e eleisaun 2030 mai bele compete tan ho mane sira,” nia fó korajen.
Antes ne’e kandidata feto ba xefe suku hamutuk na’in-21 kada postu hosi postu Viqueque vila kandidata feto hamutuk na’in haat, kandidata feto ba xefe iha postu Uatucarbau na’in haat, kandidata feto iha postu Lacluta na’in rua, kandidata feto hosi postu Ossu na’in neen, kandidata feto hosi postu Uatulari na’in lima; totál kandidata feto ba xefe hosi munisípiu Viqueque hamutuk na’in-21. Enkuantu mane totál hamutuk na’in-135 no na’in-35 maka eleitu ba xefe suku.
Jornalista : Vitorino Loeps da Costa
Editór : Rafael Ximenes de A. Belo
