DILI, 15 novembru 2023 (TATOLI)—Prezidente Parlamentu Nasionál (PPN), Maria Fernanda Lay, hateten Prezidente Repúblika (PR), José Ramos Horta, kansela hala’o vizita Estadu ba Vietname ho Jordánia, tanba rona Deputadu sira krítika makaas.
Notísia Relevante: PN autoriza PR Horta vizita Vietname no Jordánia
“Viajem ba rai-li’ur, Prezidente kala rona Deputadu, Joaquim dos Santos, Antoninho Bianco no deputadu sira seluk hirus loos, ne’ebé Prezidente horse’ik lokra’ik kansela nia viajem ba Jordanía no Vietname. Ne’ebé, ha’u hanoin Prezidente mós rona ita-nia hanoin no kritíka, liuliu opozisaun ne’ebé fó kritíka konstrutiva. Ami agradese ba ida-ne’e,” Prezidente PN ne’e hateten liuhosi reuniaun plenária extaordinária iha sala plenária PN, kuarta ne’e.
Mezmu nune’e, nia hateten, PR sei iha vizita ida de’it ba Dubai ne’ebé tenke ba atu partisipa eventu liga ho mudansa klimátika ne’ebé importante tebes mós ba Timor-Leste, nune’e sei hato’o pedidu iha fulan ne’e nia laran ba PN hodi hetan asentimentu.
Antes ne’e, Deputadu hosi bankada opozisaun iha PN kestiona Prezidente Repúblika tanba desde simu pose to’o ohin loron, prezidente repúblika hala’o viajen barak liu ba rai-li’ur.
Deputadu FRETILIN, Joaquim dos Santos, hateten kompeténsia PN nian ida mak fó ka la fó asentimentu PR atu hala’o vizita Estadu ka vizita serbisu ba rai-li’ur.
“Horisehik, PN aprova asentimentu, signifika PN maiória konkorda ho PR nia pedidu atu halo vizita ba Jordánia ho Vietname. Agora depois asentimentu PR kansela ninia vizita ne’e la’ós problema PN nian. Agora, PR atu ba ka la ba ne’e problema ajustamentu kalendáriu traballu PR ninian. PR mak tetu ninia kna’ar obrigasaun konstituisionál. PR husu mai PN autoriza, depois autoriza kansela fali viajen ne’e la signifika PR la respeitu PN nia desizaun,” nia hateten.
Nune’e, nia dehan, agora la’ós dehan PR kansela ninia vizita tanba Deputadu ida ka rua ninia deklarasaun, ne’e la loos maibé se Deputadu ko’alia iha PN ne’e lori naran organizasaun no povu atu halo balansu polítiku.
Tanba ne’e, nia dehan, pozisaun Parlamentu Nasionál (PN) ne’e la’ós Deputadu mesak mak reprezenta maibe ne’e órgaun koletivu.
Notísia Relevante: Opozisaun husu PR Horta aprezenta rezultadu vizita ba rai-li’ur
Jornalista : Nelson de Sousa
Editór : Cancio Ximenes
