OÉ-CUSSE, 17 novembru 2023 (TATOLI) – Madalena Sani, nu’udar feto dahuluk iha Rejiaun Administrativa Espesiál Oé-Cusse Ambeno (RAEOA) asume kargu nu’udar xefe aldeia Hautefo, iha suku Ban-Afi, sub-rejiaun Nítibe.
Notísia relevante: Feto na’in-haat hosi Oé-Cusse sei kompete ho mane 89 iha eleisaun suku
Diretora STAE Oé-Cusse, Luisa da Costa, hateten, eleisaun órgaun suku 2023 ne’e, feto ne’ebé kandidata ba xefe suku no xefe aldeia menus, tanba xefe suku iha kandidata na’in-haat de’it no xefe aldeia kuaze na’in-10.
“Ita haree rezultadu eleisaun, iha xefe 18 maioria asumi hosi mane sira, só uniku feto ida hosi suku Ban-Afi, naran Madalena Sani, maka eleitu hanesan xefe aldeia Hautefo, ida-ne’e foin primeira vés feto ida bele sai lideransa komunitáriu iha Oé-Cusse,” Luisa da Costa ba Agência Tatoli iha Oé-Cusse, sesta ne’e.
Nia argumenta, eleisaun órgaun implementa bazea matadalan Lei númeru 9/2016 kona-bá prosedimentu aprezentasaun kandidatura no lala’ok eleisaun ba membru orgaun suku sira no oinsa hato’o keisa no reklamasaun karik mosu irregularudade iha prosesu eleisaun.
“Maibé dezde primeiru ronde mai to’o seguda ronde, parte STAE ita lá rejista keixa no reklamasaun liga ho eleisaun suku, signifika katak, iha Oé-Cusse, eleisaun ne’e la’o di’ak,” nia katak.
Diretora STAE, hateten, xefe suku sira-né’ebé re-eleitu iha eleisaun orgaun suku ba períodu 2023-20230 hamutuk xefe suku 11 sira ne’ebé eleitu foun iha hitu, ne’ebé xefe suku eleitu hamutuk na’in-18 maioria mane hotu.
Notísia relevante: Xefe suku foun sei simu pose iha 28 novembru no simu motorizada foun iha 2024
Madalena Sani, agradese ba povu aldeia Hautefo, no suku Ban-Afi, tanba fó fiar atu lidera aldeia Hautefo durante tinan hitu.
“Ha’u agradese ba konfiansa eleitór sira liu-liu ami-nia aldeia Hautefo suku Ban-Afi, tanba fó ona sira-nia fiar mai ha’u atu lidera aldeia Hautefo ba tinan hitu, ida-ne’e mós primeira vez ami-nia suku, iha feto ida hakna’ar iha autoridade lokál Ban-Afi,” nia orgullu.
Nia relembra, iha eleisaun órgaun suku volta dahuluk, kandidatu ba xefe aldeia Hautefo iha na’in-haat, maibé rezultadu ikus, povu fó fiar ba nia (Madalena Sani) ho votu maioria simples.
“Agradese ba ami-nia xefe aldeia sesante Albinu Cab, tanba tinan hitu presta ona servisu iha aldeia Hautefo, ha’u promete sei kontinua servisu ne’ebé antes ne’e halo ona atu servisu ba povu suku Ban-Afi,” nia katak.
Entretantu, totál eleitór iha suku Ban-Afi hamutuk 1.515, mane 766 no feto 749, komposta hosi aldeia tolu, aldeia Cuanobe 660 aldeia Hautefo 645 no aldeia Neofmetan hamutuk 210.
Notísia relevante: PNTL Oé-Cusse la rejista krime durante eleisaun órgaun suku
Jornalista: Abílio Elo Nini
Editór:Evaristo Soares Martins
