DILI, 21 novembru 2023 (TATOLI) – Diresaun Nasionál Asaun Sosiál Eskolár Ministériu Edukasaun (ME) ninia papél maka halo monitorizasaun ba implementasaun Programa Merenda Eskolár, nune’e bele akompaña progresu no dezafiu saida maka akontese iha eskola sira.
Tanba ne’e mak Sekretáriu Estadu Edukasaun, Ensinu Sekundáriu no Eskola Téknika, Domingos Lemos, husu ba Diretór Nasionál Asaun Sosiál Eskolár, Joaquim Martins, atu organiza ekipa hodi monitoriza iha eskola sira sobre implementasaun merenda eskolár.
“Ha’u husu ba diresaun parte merenda eskolár tenke halo nafatin akompañamentu mezmu programa ne’e tama iha Ministériu Administrasaun Estatál nian, maibé ita iha obrigasaun morál atu kontinua tau iha ita-nian obrigasaun”, Domingos Lemos hatete iha Vila Verde, ohin.
Nia salienta, bainhira Ministériu Edukasaun lakohi toma responsabilidade atu halo monitorizasaun maka kuandu mosu problema ruma bele kria impaktu boot ba programa ne’e.
“Ha’u husu nafatin ba diresaun atu kontinua monitoriza hodi bele update saida maka la’o iha terrenu, nune’e bainhira mosu buat ruma ministériu bele iha alternativa atu toma responsabilidade”, afirma.
Governante ne’e informa katak Ezekutivu iha ona hanoin ruma ba tinan foun ne’e atu halo mudansa ba manuál merenda eskolár, nune’e bele hasa’e labarik sira-nian nutrisaun, liuhusi aproveita orsamentu ne’ebé maka Governu prevee ona ba eskola sira.
Daudaun ne’e, orsamentu ba merenda eskolár rasik ne’ebé prevee ona ba kada alunu iha loron ida hamutuk sentavu 0,42 ne’ebé fahe sentavu 0,35 ba han estudante ida nian no ba koziñeira sira sentavu 0,7.
“Hanoin ruma ne’ebé maka iha ona ba futuru maka presiza halo mudansa iha manuál merenda eskolár ne’e atu hasae nutrisaun di’ak ba estudnate sira hodi bele garante estudante sira-nian dezenvolvimentu iha futuru ho saudável”, reitera.
Notísia relevante: Implementasaun merenda eskolár iha área remota hasoru problema
Jornalista: Tomé Amado
Editora: Maria Auxiliadora
