DILI, 12 setembru 2023 (TATOLI) – Eskola sira iha área remota hasoru problema iha implementasaun merenda eskolár, tanba ne’e Ministériu Administrasaun Estatál no Ministériu Edukasaun sei buka solusaun hodi rezolve imediata kestaun ne’e.
Difikuldade ne’ebé mak eskola sira ne’e iha mak falta bee atu prepara merenda, dapur laiha no eskola balun laiha ai-han atu fornese ba alunu sira tuir rekomedasaun ka menú husi husi Ministériu Saúde.
Ministra Edukasaun, Dulce de Jesus, hatete ministériu sei halo esforsu hodi asume responsabilidade atu garante implementasaun programa ne’e ho di’ak ba alunu sira.
“Monitorizasaun ba merenda eskolár kontinua la’o. Daudaun ha’u mós simu ona informasaun husi atividade fiskalizasaun deputadu sira iha terrenu tanba Ministériu Edukasaun iha responsabilidade tomak atu halo monitorizasaun hodi garante implementasaun ho loloos”, governante afirma iha Ministériu Finansa, ohin.
Merenda eskolár ne’e kada alunu hetan sentavu 0,42. Husi osan ne’e fahe sentavu 0,35 ba han no restu sentavu 0,07 uza hodi sosa fali buat seluk hodi kompleta nesesidade koziña nian.
Rekorde katak Ministru Administrasaun Estatál, Tomás Cabral, antes ne’e sujere ona katak presiza aumenta merenda ba kada alunu husi sentavu 0.45 ba dólar ida, nune’e fornese hahán ho kualidade ida.
Ministru ne’e hatutan Governu kompromete atu implementa refeisaun manas ba alunu sira no ne’e tenke bazeia duni ba ai-han nutritivu no variedade, nune’e alunu sira bele konsumu ho di’ak hodi bele ajuda sira partisipa iha sala-de-aula ho di’ak liután.
Programa Merenda Eskolár nu’udar subsídiu ne’ebé fó iha ámbitu asaun sosiál eskolár, ne’ebé ho objetivu hodi asegura direitu han loron-loron ho hahán saudável, ekilibrada no indispensável ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulár hodi integra ba rede públika ne’ebé situa iha rai-laran hodi promove ninia prosesu ensinu no aprendizajen.
Notísia relevante: Bankada KHUNTO husu mellora implementasaun programa merenda eskolár
Jornalista: Tomé Amado
Editora: Maria Auxiliadora
