COVALIMA, 23 novembru 2023 (TATOLI) – Bee Timor-Leste (BTL, E.P) iha munisípiu Covalima falta funsionáriu atu kontrola distribuisaun bee-moos ba komunidade sira, hatete Koordenadór BTL, Castro Dody Ramos.
“Ita menus rekursu umanu, tanba ne’e ha’u haruka ona pedidu ba iha nasionál. Pedidu refere iha ona rezultadu hodi loke ona konkursu, nune’e sé maka admitidu bá serbisu hamutuk ho ami”, Castro Dody Ramos afirma ba Tatoli, ohin.
Funsionáriu ne’ebé oras ne’e serbsu iha BTL Covalima hamutuk na’in-15 ne’ebé mak kontrola distribuisaun bee-moos ba komunidade sira, maibé rekursu ne’e seidauk to’o.
BTL sei halo rekrutamentu ba funsionáriu sira bazeia ba projetu ne’ebé maka la’o hela iha postu administrativu Fohorem, Zumalai, Suai no Fatululik ne’ebé iha ona kompañia manán na’in.
“Ita iha projetu ne’ebé on going no iha ona kompañia manán na’in no iha Tilomar tama iha faze konkursu públiku ne’ebé loke ona ba faze daruak, halo perfurasaun bee-matan, halo kanalizasaun bee-moos ba komunidade”, dehan.
Alvu BTL nian mak atu rekruta funsionáriu 25 ne’ebé kada postu administrativu sei koloka funsionáriu nain-rua hodi kontrola bee-moos ba populasaun sira.
Tuir dadus, uma-kain 1.665 ho totál populasaun 10.965 maka asesu ona bee-moos iha munisípiu Covalima.
Notísia relevante: Tékniku BTL. E, P halo teste bee-matan iha Ogues Covalima
Jornalista: Celestina Teles
Editora: Maria Auxiliadora
