iklan

HEADLINE, MUNISÍPIU, OÉ-CUSSE (RAEOA), POLÍTIKA

Kompromisu Konsellu Suku Pante Makasar, ‘hametin independénsia-unidade nasionál’

Kompromisu Konsellu Suku Pante Makasar, ‘hametin independénsia-unidade nasionál’

Ministru Interior Francisco Guterres, foto hamutuk ho Konsellu Suku sira hafoin tomada pose iha kampu Oebau Oe-Cusse, tersa nee. Imajen Tatoli/Abilio Elo Nini.

OÉ-CUSSE 28 novembru 2023 (TATOLI) – Governu liuhosi Ministériu Interiór (MI), tersa ne’e ofisialmente fó pose ba Konsellu suku sira hamutuk suku ualu iha sub-rejiaun pante Makasar Rejiaun Administrativa Espesiál Oé-Cusse Ambeno (RAEOA).

Notísia relevante: Pose ba Konsellu Suku sira iha Oé-Cusse sei realiza kada sub-rejiaun

Molok simu pose, Ministru Interiór, Francisco Guterres, lé kompromisu de onra katak, ho identidade eleitu ba Konsellu Suku no lideransa komunitáriu  iha suku aldeia to’o bairu idak-idak, hodi jura ba Nai Maromak ba povu no ondra tomak, hodi kumpri, no leal ba funsaun ne’ebé simu ona.

“Promete hodi kumpri no hala’o tuir Konstituisaun no Lei, nune’e fó kbi’it no kapasidade hodi defende no hametin independénsia no unidade nasionál,” Francisco Guterres, haktuir kompromisu iha ámbitu seremónia pose ba Konsellu suku sira.

Governante ne’e, afirma, momentu ida-ne’e la’os de’it atu marka tempu hahú mandatu hosi sira hotu, ne’ebé ohin simu pose, maibé mós hatudu kompromisu ida-ne’ebé, atu hatúr hikas fali prinsípiu hirak fundamentál sira-e’ebé sai hanesan rin, ba ita-nia regime demokrátiku, no ba objetivu hirak estratéjiku, ne’ebé hatúr ona hosi ita-nia Governu, hodi promove dezenvolvimentu nasionál.

“Honra no esperánsa bo’ot tebes, maka ha’u mai preside serimónia, simu pose ba lidér komunitáriu sira, ne’ebé foin lalais eleitu iha eleisaun liu bá,” nia afirma.

Notísia relevante: Xefe suku foun sei simu pose iha 28 novembru no simu motorizada foun iha 2024

Jestór sub-rejiaun Pante Makasar, Euriku da Costa Bobo, deklara seremónia tomada pose ne’e, nu’udar rezultadu eleisaun orgaun suku iha loron eleisaun 28 outubru no volta daruak iha 13 novembru 2023, hafoin realiza eleisaun suku no konfirmadu ho lei númeru 9/2016, loron 08, fulan  jullu.

Nia informa, iha sub-rejiaun Pante Makasar, iha suku ualu (8) ho aldeia 29, hanesan xefe suku Costa Frasisco Colo ho membru Konsellu Suku hamutuk na’in-19, xefe suku Nípani Pedro Neno Eko ho Konsellu Suku hamutuk na’in-10.

Xefe suku Lifau Delfinu Sole ho membru Konsellu Suku hamutuk na’in-13, xefe suku Lalisuk Hermengildu Lalisuk ho membru Konsellu Suku hamutuk na’in-16, xefe suku Cunha Domingos Seko Caunan ho membru Konsellu Suku hamutuk na’in-19.

Xefe suku Bobokase Tomas Nesi, ho Konsellu Suku hamutuk na’in-10, xefe suku Naimeko Markus Liu, ho membru Konsellu Suku hamutuk na’in-16, xefe suku Taiboko Mateus Nas, ho membru Konsellu Suku hamutuk na’in-16.

“Nu’udar jestór sub-rejiaun Pante Makasar, ha’u deklara rezultadu eleisaun orgaun suku válidu, para mandatu sira, konforme prevista ona iha lei suku nian, rezultadu públikasaun ne’e ha’u sei submete kopia ba Autoridade RAEOA no MAE,” nia deklara.

Iha biban ne’e, xefe suku Lalisuk, Hermenegildo Lalisuk, reprezenta lideránsa komunitáriu hato’o agradese ba povu tanba fó fiar atu servisu suku ba mandatu tinan hitu.

“Ha’u reprezenta xefe suku eleitu, ami agradese ba povu tomak iha sub-rejiaun Pante Makasar, ita-ne’e la’os atu ukun ita-nia povu maibé atu sai servidór ba povu iha Oé-Cusse,  tan ne’e ami sei hamutuk ho povu durante tinan hitu, sei la haree ba polítika ras no seluk-tán,” nia orgullu.

Notísia relevante:PM Xanana husu xefe suku eleitu kontrola populasaun hado’ok hosi krime

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!