DILI, 28 novembru 2023 (TATOLI) – Sosiedade Sivil Timor-Leste liuhosi Forum Organizasaun Naun Governamental Timor-Leste (FONGTIL) husu ba Prezidente Repúblika (PR), José Ramos Horta, atu veta proposta lei nú 4/VI husi alterasaun lei nú 5/2004, 5 maiu kona-bá estautu deputadu sira atu hetan subsídiu kada fulan ba tansporte ho montante $1.600 no saúde $600.
“Deputadu sira simu osan bo’ot fulan-fulan, deputadu sira la’ós ema vulnerável, tanba ne’e husu ba na’in Prezidente Repúblika hodi halo fiskalizasaun kle’an liu, molok halo aprovasaun subsídiu transporte no saúde ba deputadu sira”, hatete portavóz Sosiedade Sivíl Timor-Leste, Esterlita Pereira, liuhusi konferénsia imprensa iha Farol-Dili.
Notísia relevante: Ai-moruk menus iha HorEX Baucau
Tuir artigu 95, nia dehan fó kompeténsia ba deputadu iha Parlamentu Nasionál bele halo lejizlasaun kona-ba kestaun bázika ba polítika interna no externa nasaun nian, maibé la’ós tempu kria ezbosu lei atu aprova osan subsídiu bo’ot hodi benefisia sira nia aan no haluha kompromisu polítika ba povu.
“Na’in deputadu sira iha fuan no sentimentu ka la’e? povu barak moris terus no susar, kondisaun uma la dignu no lahan hahan nutritivu. Maibé deputadu sira moris di’ak no riku ba beibeik. Povu iha área rurál moris vulnerável, maibé deputadu sira, uza votu populasaun nian hodi aprova subsidiu oi-oin hodi fó previléjiu ba sira nia aan”, nia lamenta.
Nune’e, Portavóz ne’e sujere ba Parlamentu Nasionál atu tau prioridade ba subsídiu bolsa da mãe ne’ebé hasai tiha ona iha Orsamentu Jeral Estadu (OJE) tinan 2024 nian, problema sosiál hanesan foinsa’e dezempregu. Iha setór saúde falta medikamentu no ambulánsia. Iha setór edukasaun laiha livru, merenda eskolar la nutritivu, fasilidade la kompletu, kondisaun eskola a’at.
Notísia relevante: Sentru Saúde Cailaco menus karreta ambulánsia
Aleinde ne’e, iha setór agrikultura mós menus tratór, irigasaun a’at, fini menus iha rai laran no iha setór infraestrutura ne’e menus bee moos no estrada kondisaun a’at iha área rurál ne’ebé hadi’a ho osan empreztimu husi agência internasionál sira hanesan Banku Dezenvolvimentu Aziátiku, Banku Mundiál no Agência Koperasaun Internsionál Japaun.
Iha fatin hanesan, Diretór Ezekutivu Luta Hamutuk, José Alves da Costa, konsidera ezbosu lei ne’e hanesan korrupsaun legál ne’ebé komete hosi deputadu sira.
Tanba ne’e, nia husu ba Prezidente Repúblika, José Ramos Horta tenke veta projetu lei ne’ebé deputadu kria ba sira nia aan rasik atu hetan subsídiu tansporte no saúde.
“Ita hakarak ita nia deputadu sira fó prioridade ba povu nia moris. La’ós tempu atu aprova subsídiu ba sira nia aan. Ha’u hanoin ida ne’e injustisa sosiál, la justu no ha’u hanoin korrupsaun legál ida. Ita tenke hapara no sira la merese atu aprova ba sira nia aan”, nia sujere.
Notísia relevante: Sala haat iha EBF Lour la segura ba estudante sira
Komunidade preokupa estrada ba Laclubar Vila aat
Jornalista: Jesuína Xavier
Editór : Florencio Miranda Ximenes
