iklan

EKONOMIA, HEADLINE, MUNISÍPIU, OÉ-CUSSE (RAEOA), SOSIEDADE SIVĺL

Francisco Colo promete lidera suku Costa ho responsabilidade

Francisco Colo promete lidera suku Costa ho responsabilidade

Xefe suku Costa sesante, Aleixo Abi, entrega servisu ba xefe suku atuaá Francisco Colo. Imajen Tatoli/Abílio Elo Nini.

OÉ-CUSSE, 01 dezembru 2023 (TATOLI) –  Xefes suku Costa, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), Francisco Colo, promete sei lidera aldeia lima iha suku Costa ho responsabilidade durante mandatu tinan hitu, 2023-2030.

Notísia relevante: Kompromisu Konsellu Suku Pante Makasar, ‘hametin independénsia-unidade nasionál’

Francisco Colo, hato’o promesa ne’e iha ámbitu serimónia hand over ka entrega servisu hosi xefe suku sesante Aleixo Abi, iha sede suku Costa, bairru Masin, sesta ne’e.

“Primeiru husu ba xefe aldeia, delegadu-delegada, joven feto-mane to’o lia-na’in, presiza konsiderasaun, kooperasaun no nakloke ba malu, atu lidera suku Costa ba futuru di’ak, ita eleitu lidera suku Costa, ne’e la’ós oportunidade maibé responsabilidade hanesan foin daudaun ita promete iha simu pose, katak atu haree no atende ita-nia povu” Francisco Colo hateten.

Autoridade komunitáriu ne’e, informa, responsabilidade importante tanba komunidade fó ona konfiansa, tán ne’e kooperasaun konsellu suku ho komunidade importante.

Tuir nia, polítika ne’ebé xefe suku sesante implementa ona, sei kontinua atu hadi’a no kontinua tuir saida maka povu hakarak.

“Ha’u sei kontinua saida maka antes ne’e halo ona buat-ne’ebé di’ak iha suku laran, ha’u sei kontinua hatutan, la’ós so’e no abandona, no saida maka halo ona ladún di’ak, ha’u sei komunika ita hamutuk bele hadia’, liuliu atendimentu públiku iha suku, suku preparativu sira atu sai suku foun,” nia promete.

Notísia relevante:Konsellu Suku tenke harii sosiedade justu, inkluziva no prósperu

Iha biban ne’e, xefe suku sesante, Aleixo Abi, sujere ba xefe suku eleitu presiza tau prioridade atu harii suku foun, tanba geografikamente suku Costa luan no envolve populasaun barak mai hosi suku 18.

“Ha’u hanoin ba oin, ha’u husu de’it xefe suku eleitu atu kontinua programa sira-ne’ebé, ha’u la konsege halo hotu iha ha’u-nia mandatu, liuliu suku preparativu rua, Monemeko ho Kutete, tanba daudaun ne’e sira-nia sede suku Autoridade RAEOA harii ona, hein validasaun de’it hosi Ministériu Administrasaun Estatál (MAE),” Aleixo Abi hateten.

Tuir nia, tanba antes ne’e ekipa téknika hosi MAE halo ona levantamentu dadus iha suku Costa, atu fahe ba suku tolu tán, tanba geografikamente área suku luan tebes, difikulta atendimentu ba komunidade sira asesu ho distánsia besik.

Notísia relevante: Ministru Francisco Guterres husu Oé-Cusse oan promove pás-estabilidade

Entretantu, totál populasaun iha suku Costa hamutuk 17.351, mane 8.848 no feto 8.503, komposta hosi aldeia lima, hanesan aldeia Lakufoan 707, aldeia Mahata 1.899, Oésono 1.395, Oétfo 1.067 no aldeia Sanane hamutuk 11,237.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!