VIQUEQUE, 04 dezembru 2023 (TATOLI)–Autoridade munisípiu Viqueque hamutuk ho Sosiedade Sivil, Diretór liña ministeriál, inklui ekipa responsável sira, segunda ne’e, halo koordenasaun serbisu kona-ba fenómenu naturál ne’ebé akontese iha territóriu tomak.
Administradór munisípiu Viqueque, Januário Soares ‘Bolly’, hateten, ekipa ne’ebé envolve mós ho Servisu Saúde halo koordenasaun hodi responde no hamenus risku hosi fenómena naturál sira ne’ebé karik bele afeta ba komunidade Viqueque.
“Ohin, ekipa hosi dezastre naturál munisípiu Viqueque, kompostu hosi Autoridade Protesaun Sivil, Cruz Vermelha, Servisu Saúde munisipál no parseiru sosidade sivil sira, ami halo koordenasaun ba fenómenu El Nino no La Niña, ne’ebé daudaun akontese iha ita-nia rai. Hosi koordenasaun serbisu ne’e, karik afeta ba ita-nia abitante sira, ita bele fó apoia emerjénsia,” Januário Soares, hateten, hafoin enkontru preparasaun, iha salaun administrasaun.
Notísia relevante : Protesaun Sivíl prepara prevensaun el-nino iha Baucau
Nune’e, ekipa sei prepara pakote emerjénsia hanesan ai-han no bee-moos ba abitante iha munisípiu Viqueque ne’ebé afetadu fenómenu ne’e.
“Daudaun ne’e bailoro naruk, nune’e abitante sira balun enfrenta falta bee-moos no ai-han ruma. Nune’e, ekipa sei fó apoia emerjénsia sedu. Ba oin ekipa sei halo identifikasaun ba abitante afetadu, liu-liu parte Bombeiru sei apoia bee,” Autoridade Viqueque akresenta.
Aleinde ne’e, ekipa sei rekolla dadus hosi autoridade komunitária kona-ba abitante sira ne’ebé ho distánsia dook hosi bee-matan atu ekipa bele distribui bee.
“Bee importante, bainhira bee laiha, ita-nia vida mós sei laiha. Ho nune’e, ekipa dezastre naturál munisípiu Viqueque sei tau importánsia ba bee atu abitante sira labele falta bee,” nia tenik.
Iha fatin hanesan, Autoridade Protesaun Sivil munisípiu Viqueque, Matias da Silva, esplika, fenómenu La Niña sei hamosu anin no udan, enkuantu La Nino sei akontese bailoro naruk, ne’ebé maka sei afeta abitante sira.
“Liuhosi sorumutu ida-ne’e ita fó apoia ba malu atu halo atuasaun ba fenómenu rua hodi halo identifikasaun ba abitante sira ne’ebé menus bee no ai-han sira atu ita bele tau-matan ba abitante sira,” nia realsa.
Daudaun Autoridade Protesaun Sivil seidauk halo identifikasaun ba abitante sira ne’ebé enfrenta ba fenómenu rua ne’e, maibé liuhosi koordenasaun ne’e hotu ekipa sei tun ba baze hodi halo identifikasaun.
Jornalista : Vitorino Lopes da Costa
Editora : Julia Chatarina
