DILI, 08 dezembru 2023 (TATOLI) – Don Virgílio Kardeál do Carmo da Silva, SDB, apresia inisiativa Governu hakarak hametin dame no domin iha país ne’e liuhosi, halo juramentu ba membru FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) hodi hases an hus Grupu Arte Marsiál (GAM) no Grupu Arte Rituál (GAR).
“Hakarak fó parabéns ba ita nia Primeiru-Ministru ne’ebé horiseik konsege hala’o juramentu no parabéns ba ita nia Forsa Defeza Timor-Leste no Polísia Nasionál Timor-Leste ne’ebé halo juramentu”, Don Virgílio Kardeál, ne’e hateten iha loron solenidade Imaculda Conceição, Padroeira Arkidioseze Metropolitana Dili.
Notísia relevante: Membru F-FDTL 175 halo juramentu hases aan hosi GAM no GAR
Atividade juramentu ne’e, nia dehan Governu hatudu vontade di’ak lori Timor bele sai sosiedade ida hakmatek no iha espíritu fraternidade iha moris loron-loron.
“Governu nia hakarak atu lori Timoroan hotu bele sai maun alin no husik violénsia tau ba kotuk” nia refere.
Don Virgílio reforsa tan katak atu hakat daudauk ba Natál no moris hela iha tempu adventu, sarani no ema hotu prepara aan hodi bele simu kosok oan Jesus ho di’ak.
“Ita atu hakat daudaun ba Natál, entaun ita tuir Na’in Feto prepara aan ba nia oan atu mai iha loron Natal. Nune’e ita hotu presiza kria pás no dame”, Bispu metroplitana ne’e husu.
Kardeál ne’e husu ba governante sira no ema hotu-hotu fó liman ba malu no kolabora malu hodi sosializa valór sira ne’e hotu hodi hatu’ur dame no domin tanba Natál besik mai daudaun.
Notísia relevante: Xanana husu membru F-FDTL no PNTL hatudu onestidade hodi servi povu no nasaun
Jornalista: Jesuína Xavier
Editór : Florencio Miranda Ximenes
