DILI, 26 dezembru 2023 (TATOLI)- Primeiru-Ministru, Kay Rala Xanana Gusmão akompaña hosi Ministru Koordenadór Asuntus Ekonómiku no Ministru Turizmu no Ambiente, Francisco Kalbuadi Lay no Embaixadór ba Foin Sa’e ho Diversidade Hotu-Hotu, Kay Olok Gusmão fahe prezenti natál la babarik na’in-1.500 liu.
Antes fahe prezente, sei hala’o uluk serimónia tradisaun dansa kulturál simu labarik sira no kontinua sunu lilin hodi hato’o orasaun no reflesaun natál hamutuk ho labarik sira hotu.
“Prezente natál hanesan pasta, livru lapizeira no ekipamentu eskola nian seluk tan fahe direta hosi Embaixadór ba Foin Sa’e ho Diversidade Hotu-Hotu, Kay Olok Gusmão hamutuk ho ekipa protokolu Gabinete Primeiru-Ministru no Ministériu Turizmu”, haktuir nota ne’ebé Agência Tatoli simu, tersa ne’e.
Labarik na’in 1500 liu ne’e mai husi Grupu orfanatu 10 hanesan, Madres Uma Mahon Salele-Covalima, Madres Same-Manufahi, Ahisaun Fatuhada, Centru Nasionál Rehabilitasaun (CNR) Becora, Uma Mahon, Madre Alma Sister Pantai Kelapa, GrupuKultura Labarik Viqueque no labarik sira iha sidade Dili.
Selebrasaun natál hamutuk ne’e nu’udar eventu anuál ne’ebé Primeiru-Ministru, Kay Rala Xanana Gusmão hala’o la labarik sira no ema ho nesidade espesiál ka ema ho difesiénsia ne’ebé konsidera Líder rezisténsia ne’e nu’udar Liurai ba ema ho difisiénsia iha Timor-Leste ne’ebé sempre hatudu ninia domin ba ema hotu.
Biban hanesan PM Xanana fahe mós aifuan fresku, masan, sabraka, no uvas ba labarik sira hodi konsumu.
Iha parte seluk, Diretora Jerál Gabinete Primeiru-Ministru, Ursula Ferrão Pinto agradese ba kooperasaun hodi grupu orfonatu sira iha Dili laran hodi lori labarik sira partisipa ona iha festa natál hamutuk hodi simu sira nia prente hosi Xefe Governu.
Diretora, Ursula Ferrão Pinto hatutan, antes natál, Xefe Governu Xanana orienta ekipa fahe mós nesidade bázika ba Madre sira iha Ostico-Baucau, Eskola Fatumaca ne’ebé nesidade baziku fó direita ba Pe. Elígio Locatelli, sdb.
Grupu Orfanatu Madre Lega- Baucau, Irmas Clarissas Aldeia Tunubibi, Suku Tapo Memo Maliana, Bobonaro, Madre Acadiru Laran, Maliana, Madre Memu- Maliana no Madre sira iha Uma Mahon Salele, Covalima.
Jornalista : Antónia Gusmão
Editór : Florencio Miranda Ximenes
