iklan

DILI, HEADLINE, KAPITÁL

Uma-kain 10-resin iha Becusse Kakeu Laran sofre inundasaun

Uma-kain 10-resin iha Becusse Kakeu Laran sofre inundasaun

Akontese udan bo'ot iha kapital Dili, afeta ba komunidade Becusse Kakeu Laran, segunda (09/01). Imajen Tatoli/Francisco Sony

DILI, 09 janeiru 2024 (TATOLI) – Udan durante oras rua, hahú 15:00-17:00 otl, iha Dili, rezulta uma-kain 10-resin iha Kakeu Laran, Aldeia Because, Suku Bekora no Postu Administrativu Cristo Rei, sofre inundasaun no sasan uma-laran inklui dokumentu importante balu hetan estraga totál.

“ami nia sasan uma-laran estraga totál, hanesan kulsaun, jeleira, telivizaun, sasan dapur hanesan foos mós bokon hotu no ami nia dokumentu hanesan sertidaun ami família nian, passaporte dodok hotu”, Família vítima Joaefa da Costa, dehan ba Agência TATOLI, ohin.

Família vítima husu ba Governu liuliu parte protesaun sivíl atu bele destaka ekipa bombeiru iha fatin refere hodi supa sai bee ne’ebé nalihun iha uma-laran no bele normaliza valeta ne’ebé nakfera iha dalan ninin parte estrada Becusse ligasaun ba Becora no Taibessi.

Iha fatin hanesan, komunidade Matias Dias ne’ebé nia uma hetan estraga hosi inundasaun reforsa, bee tama sira nia uma, kauza hosi inundasaun no valeta ne’ebé nakfera tanba valeta ne’e konstrui hosi parte Planu Dezenvolvimentu Suku (PNDS) ne’ebé la iha kualidade.

“Ami-nia dalan ne’e kuaze hanesan los mota de’it ona, ida-ne’e kauza hosi PNDS, sira mai halo estrada ne’e kanaliza saluran ladún los, entaun estraga hotu ami komunidade nia uma mak sai vítima”, nia hatete.

Tuir observasaun Agência TATOLI nian iha Dili, maioria estrada públiku sira nakonu ho bee hosi parte Bidau, Colmera Balide no Comoro.

Komunidade barak mak sai ba hamrik iha estrada ibun no balun ne’ebé bee estraga tenta atu salva sasan uma-laran maibé la konsege tanba bee nia korrente makas tebes.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!