MANATUTO, 12 janeiru 2024 (TATOLI)— Diretur Ezekutiva PERMATIL, Eugénio Lemos iha komemorasaun loron nasional Ai-Kameli no Floresta ba da-VII fó rekomendasaun ba governu hodi halo kombinasaun entre konservasaun bee no kuda ai nune’e bele garante sustentabilidade ba ai horis sira.
“Hanesan ita hatene katak iha Timor ne’e foho mak barak, entaun se’e ita kuda ai deit entaun la to’o tanba ai mos presiza tempu naruk hodi moris, no ami nia rekomendasaun ba Ministeriu mak ita tenke halo kombinasaun katak halo uluk jestaun iha foho leten atu kapta udan ben liu husi ke’e debu, no satan kadalak sira, ke’e teras no halo posu infiltrasaun (sumur resapan) nune’e bele kaptura udan ben hodi infiltra tama ba rai laran nune’e bainhira kuda ai nia posibilidade moris boot, karik la kombina hamutuk maka ita bele gasta tempu mak barak,” Ego Lemos dehan ba Tatoli iha Foho Balak, Manatuto, sesta ne’e.
PERMATIL rasik kontente ho inisiativa Governu hodi kuda ai no prontu fo’o apoiu ba governu atu halo konservasaun be’e nune’e bele garante posibilidade moris ba ai bele boot.
Parte seluk, Ministru Agrikultura, Peska, Pekuaria no Floresta (MAPPF), Marcos da Cruz hato’o agradese ba ONG lokal sira nia apoiu hodi halo konservasaun be’e tanba ida ne’e sei apoiu ba sustentabilidade ai horis inklui hamenus degradasaun no erozaun ba foho sira.
Notisia relevante : Selebra Loron Floresta : Governu mobiliza ona Ai-kameli 2.000 kuda iha foho Balak
“Ita agradese ba ONG lokal sira nia servisu durante ne’e hodi halo konservasaun bee. Agora ita iha ona eskavador sira, ba ida ne’e (foho Balak) ita sei lori eskavador mai ke’e netik barajen kiik, halo bee lihun, kapta bee no infiltra be’e hodi hamenus erozaun,” Ministru Marcos afirma.
MAPPF partikularmente liu husi Sekretariu Estadu Floresta iha politika oinsa bele replanta ai ne’ebe lori Timor nia naran ba oin hanesan Ai-kameli, no ida seluk mak refloresta ba foho sira tanba husi 60% ailaran ne’e kada tinan 1% iha degradasaun.
“Maibé planu hirak ne’e hotu presiza halo faze por faze. Iha parte ambiente mak ita laiha rekursu bee permanente, be’e iha so iha tempu udan ho kuantidade makaas hodi hamosu erozaun, ne’e duni ita infrenta probema no dezafiu barak iha desenvolvimentu parte floresta nian, atu halo buat sira ne’e ita presiza ema hotu nia kontribuisaun,” nia esplika.
Jornalista : Cidalia Fátima
Editora : Armandina Moniz
