DILI, 07 Abríl 2026 (TATOLI)—Diresaun Servisu Investigasaun Kriminál husi Eskudra Dom Aleixo identifika ona katak sidadaun ne’ebé sona ema na’in-haat iha área Beto, Suku Madohi, iha Segunda (06/04) ne’e hanesan defisiénsia mentál.
“Maluk sira akompaña orseik purvolta tuku 17:00 lorokraik, ita-nia sidadaun husi Oekusi, ita bele konsidera iha moras mentál (defisiénsia mentál), ne’ebé konsege halo asaun sona ema na’in-haat no rezulta labarik ida sete anos mate iha tempu ne’ebá, sira seluk ne’ebé iha relasaun família direta mós hetan kanek hotu, agora mós halo hela tratamentu iha ospitál. Kazu ne’e ami rejista ona ho nia NUC 0253/2026 Dom Aleixo,” Portavós Polísia Nasionál Timor-Leste (PNTL), Superintendente Xefe Polísia João Belo dos Reis, hato’o ba Jornalista sira iha ninia knaar fatin, Komandu Jerál PNTL, Kaikoli, Tersa ne’e.
Notísia relevante : Komisaun F solisita ba MS aumenta unidade saúde hodi apoia ema ho defisiénsia mentál
Komandante ne’e hateten, Polísia identifika sidadaun ne’e ema moras mentál duni no iha rejistu tratamentu.
“Ita asesu mós katak nia durante ne’e hala’o hela tratamentu iha moras mentál,” nia akresenta.
Maski nune’e, Portavós seidauk hatene sidadaun ne’e moras mentál ho tipu saida nune’e parte relevante makbele esplika.
Superintendente Xefe Polísia João Belo, hateten, Polísia asegura ona ema ne’e iha fatin seguru balun.
“Orsehik ita enkamiña kedas ba parte saúde para halo teste, loos duni ka lae, depois ita mós hetan dokumentu sira ne’e, pois ita asegura lai iha fatin balun,” nia katak.
Jornalista : Natalino Costa
Editora : Julia Chatarina
