DILI, 22 janeiru 2024 (TATOLI) – Vise primeiru-Ministru no Ministru Koordenadór Asuntu Sosiál no Ministru Dezenvolvimentu Rural Abitasaun no Komunitária no Ajénsia Estadus Unidus ba Dezenvolvimentu Internasionál (USAID), halo lansamentu ba plataforma e-learning ba organizasaun sosiedade sivil iha Timor-Leste.
“Ohin ita halo lansamentu plataforma aprendizajen ba koordenasaun, monitorizsaun avaliasaun no advokasia koletiva ida ba sosiedade sivil sira, atu uza dijitalizasaun ba sasan sira ne’e ba tempu ida agora nian”, Mariano Sabino Sabino informa ba jornalista sira bainhira remata lansamentu plataforma e-learning iha Hotel Timor, ohin.
Vise Primeiru-Ministru apresia ba atividade lansamentu ida-ne’e ba sosiedade sivil sira hodi hala’o sira nia servisu.
“Ha’u apel ba soseidade sivil atu nafatin hala’o ida idak nia papel, halo nafatin krítiku no autokrítiku, nune’e kontrolu nafatin ba osan povu nian ne’ebé mak ita uza hodi halo atividade barak iha povu nia leet, tanba ne’e mak ita tenke kontrola atu benifísiu sira ne’e ba duni povu no ema hotu tenke moris di’ak hanesan”, nia afirma.
Iha fatin hanesan, Diretór Interinu Misaun USAID, Mark Anthony White, hateten Estadus Unidus apoia lansamentu plataforma e-learning hodi empodera ONG lokál sira iha Timor -Leste.
“Ohin, ami hamutuk ho Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rural no Abitasaun Komunitária, halo lansasamentu ba plataforma e-learning ba organizasaun sosiedade sivil sira iha Timor-Leste”, Mark Anthony White esplika.
Nia haktuir, FONGTIL mak sei tau matan ba plataforma no apoiu tékniku no finanseiru mai hosi Governu no Estadus Unidus Amérika.
“Sentru aprendizajen online foun ne’ebé mak foin lansa ne’e dezeña ho estratejia atu hametin interkámbiu informasaun, koordenasaun, kapasitasaun no advokasia entre ONG sira. Espasu sentralizadu no interativu ne’e fó kbiit ba FONGTIL, organizasaun ne’ebe mak halibur, membru ONG hamutuk 270, inklui Rede ba Saúde Timor-Leste (REBAS-TL) ho membru 13. Plataforma ne’e oferese konteúdu e-learning kona-ba tópiku sira hanesań jestaun finanseira, interkámbiu informasaun, peskiza no instrumentu advokasia sira”, nia hateten.
Lansamentu plataforma e-learning ne’e aliña ho USAID nia Atividade ba sustentabilidade sistema saúde hodi apoia envolvimentu síviku no advokasia hodi haforsa sistema saúde. Nune’e USAID-Timor-Leste nia atividade ONG advokasia ba governasaun di’ak hodi fó apoiu esensiál ba kria ambiente ida-ne’ebé di’ak hodi fasilita ONG sira no hasa’e sira-nia kapasidade no fornese servisu advokasia ne’ebé bazeia ba evidénsia no sustentavel neʼebé reprezenta sidaudaun sira-nian.
Diretór Ezekutivu FONGTIL, Valentim da Costa Pinto, agradese ba Governu no Estadus Unidus tanba apoiu tékniku no finanseiru ne’ebé boot tebes ba lansamentu plataforma e-learning FONGTIL nian.
“Hodi organizasaun Sosiedade Sivil iha Timor-Leste nian naran, agradese ba Governu no Estadus Unidus tanba apoiu tékniku no finanseiru ne’ebé boot tebes ba lansamentu plataforma e-learning FONGTIL nian ne’e”, Valentim subliña.
Jornalista : Felicidade Ximenes
Editór : Zezito Silva
