DILI, 26 janeiru 2024 (TATOLI) – Prezidente Konfederasaun Desportiva Timor-Leste (CDTL-sigla portugés), Macario Sanches, informa iha tinan 2024, foku programa prioridade neen hodi dezenvolve desportiva iha Timor-Leste.
“Iha tinan 2024, ita iha programa prioridade neen mak ita sei implementa, programa sira-ne’e mós sei la’o tuir de’it akordu ne’ebé ami selebra ona ho Minisériu Juventude Desportu Arte no Kultura (MJDAK),” informa Prezidente ne’e ba Agência TATOLI, I.P, iha edifisiu CDTL Jináziu Dili, ohin.
Programa neen ne’e, nia relata ba dahuluk mak dezenvolvimentu kapasidade institusionál no rekursu umanu no iha programa ne’e oinsa atu mellora CDTL iha nivél nasionál no Munisipál.
Programa daruak, atu halo sensibilizasaun, sosializasaun, seminariu no simpoziu sira. Tinan ida ne’e CDTL sei foti tópiku importante kona-ba anti dopazet ne’ebé sei servisu hamutuk ho MJDAK.
Programa datoluk atu eleva kapasidade organizasaun desportivu sira iha territoriu nasionál no tau matan nafatin ba funsionamentu federasaun hotu ne’ebé hamahan aan iha CDTL nia okos.
Programa dahaat atu fortalese relasaun externa no sei servisu hamutuk ho Governu atu hamosu ffali jogu kopa fronteira.
Programa dalima halo monitorizasaun ba federasaun ne’ebé iha tinan kotuk realiza ona kampionatu nasionál nia rezultadu to’o ona iha ne’ebé no konsege prodús atleta foun ka lae?.
Programa daneen CDTL sei halo sondajen ida atu hatene presepsaun públiku nian kona-ba prestasaun modalidade sira nian iha Timor-Leste. Alende ne’e iha mós programa kona-ba atu promove moris saudavél ne’ebé sei envolve hosi nivél eskola atu nune’e bele abitua moris saudavél liu hosi desportu.
“Ami mós sei haree oinsa vizaun CDTL nian ba tinan 10, maibé ami tenke hein uitoan lai tanba tenke hetan alokasaun orsamentu hosi Governu no ami diskute ona ho Ministru,” nia afirma.
Alende ne’e, CDTL mós planu atu estabelese nia ramu iha Munisípiu sira tanba iha tinan 2023 konsege estabelese ona CDTL iha RAEOA, Bobonaro, Covalima, Ainaro, Ermera no Lautem. Nune’e ba Munisípiu seluk sei estabelese iha tinan ida ne’e.
Ho objetivu atu halo funsionamentu CDTL iha nivél nasionál no Munisipál, nune’e bele ultrapasa ba kampionatu nivél Munisipál, festivál desportu Munisipál.
“Ita mós sei halo formasaun ba organizasaun eleitu hanesan asosiasaun no klube sira atu sira bele iha konesimentu kle’an ba organizasaun desportiva liuhosi regulamentu no diploma ministeriál ne’ebé Governu hasai, atu nune’e asosiasaun sira iha Munisípiu bele hatene kona-ba regra desportu. Nune’e ita be’e hatene katak atividade desportu la’os atividade ne’ebé afiliadu mai polítika,” nia konklui.
Federasaun desportiva ne’ebé hamahan aan iha CDTL hamutuk 35 hanesan, Atletizmu, Aikide, Basketbol, Badmintong, Boxe, Siklizmu, Criket, Conda da Cavalho, Futeból, Halterofelizmu, Judo, Karate-do, Kempo Motosiklizmu, Natasaun, Netball, Silat Saling SKI TIFU, TaekWondo, Tenis Kamp, Tenis Meza, Voleiból, Xadres Whusu, Mhuathay, Sepaktakraw, Rama Hana, Hockey Andebl Tegbal Roller no seluk tan.
Notisia relevante: CDTL rejista Federasaun Desportiva hamutuk 35
Jornalista: Hortencio Sanchez
Editór : Florencio Miranda Ximenes
