CDTL rejista Federasaun Desportiva hamutuk 35
DILI, 05 outubru 2022 (TATOLI)— Prezidente Konfederasaun Desportiva Timor-Leste (CDTL- sigla Portugés), Macario Sanches, informa daudaun ne’e CDTL rejista ona federasaun desportiva hamutuk 35, maibé maioria federasaun sira seidauk priense rekezitu tuir diploma ministerial númeru 40/2020, kona-ba desportu.
Federasaun desportiva hamutuk 35 mak hanesan, Atletizmu, Aikido, Basketból, Badmintong, Boxe, Siklizmu, Criket, Corida da Cavalho, Futeból, Halterofelizmu, Judo, Karate-do, Kempo, Motosiklizmu, Natasaun, Netball, Silat, Saling, SKI, Tiru, Taekwondo, Tenis Kampu, Tenis Meza, Voleiból, Xadres, Whusu, Mhuathay, Sepaktakraw, Rama Hana, Hockey, Andeból, Teqball , Roller no seluk tan.
“Tuir ami nia avaliasaun durante ne’e ba federasaun hamutuk 35 ne’e federasaun desportu hamutuk lima de’it mak priense rekezitu tuir diploma ministeriál lei númeru 40/2020, maioria seidauk priense rekezitu,” dehan Macario ba Agência TATOLI iha Lecidere, kuarta ne’e.
Federasaun lima ne’ebé prinese ona rekezitu mak, Atletizmu, Futeból, Xadres Voleiból no Taekwondo.
Nune’e, nia husu ba federasaun hirak ne’ebé seidauk priense rekezitu tenke hakbesik aan ba CDTL, nune’e bele halo komlpeta sira nia rekezitu tuir saida mak lei baze desportu ko’alia.
Tanba tuir lei baze desportu ko’alia federasaun sira tenke iha asosiasaun no estabelese iha munisípiu, iha atleta, rejistu estatutu iha Notariadu no seluk tan. Bainhira sira priense ona rekezitu hotu CDTL sei intrega ba SEJD liuhosi Komisaun Nasionál Desportu (KND) hodi deside utilidade públiku ba sira.
“Outubru nia laran ami sei halo fali eventu ida atu promove fali federasaun tanba só federasaun rua de’it mak to’o agora seidauk iha estatutu no estrutura la funsiona, maibé ami sei fó hanoin bebeik ba sira atubele kompleta dokumentu sira ne’e, federasaun rua seidauk iha estatutu mak Kanuajen no Automobilizmu,” katak.
Iha biban hanesan, Sekretáriu Jerál Interenu Federasaun Boxe Amadora Timor – Leste (FBATL), Domingos Malitety, hateten, sira nia parte seidauk priense rekezitu tuir lei, maibé ko’alia ona ho CDTL no SEJD atu kompleta nune’e bele hetan utilidade públiku.
“Ami seidauk priense kritéria balun, maibé ami sei kompleta, nune’e ami mós bele asesu ba utilidade públiku,” nia dehan.
FBATL sei halo re-estrutura ba asosiasaun hotu iha territóriu nasionál tanba rekezitu ida ne’ebé seidauk priense mak hahú tinan 2000 to’o agora seidauk halo re-estruturasaun ba assosiasaun sira iha munisipiu no nasionál.
Jornalista: Hortencio Sanchez
Editór : Florencio Miranda Ximenes
